"Gmail" və "Outlook" istifadəçiləri ehtiyatlı olmalıdır: “Medusa” yenidən aktivləşib

ABŞ Federal Təhqiqat Bürosu (FTB) və Kibertəhlükəsizlik və İnfrastruktur Təhlükəsizliyi Agentliyi (KİTA) "Gmail", "Outlook" və digər populyar e-poçt xidmətlərindən istifadə edən şəxslərə yeni virus hücumları ilə bağlı xəbərdarlıq edib.

Qurumların mütəxəssisləri bildirib ki, “Medusa” adlı virus proqramı ilk dəfə 2021-ci ilin iyununda aşkar edilib və bu günə qədər 300-dən çox şəxsin məlumatlarını oğurlayıb.

Sfera.az xarici mediaya istinadən xəbər verir ki, hakerlər e-poçt vasitəsilə fişinq hücumları həyata keçirir və köhnəlmiş proqram təminatındakı boşluqlardan istifadə edirlər. Onlar qurğulara girişi təmin edən vasitəçilərlə işləyir və bu şəxslərə 100 dollardan 1 milyon dollara qədər ödəniş edirlər.

Siber təhlükəsizlik şirkəti "Symantec"in məlumatına görə, “Medusa” virus proqramını idarə edən "Spearwing" qrupu 2023-cü ildən bəri yüzlərlə insanı hədəf alıb. Qrupun saytında 400 qurbanın adı yer alsa da, real rəqəmin daha çox olduğu ehtimal edilir.

"Spearwing" qurbanlarını ikiqat şantaj metodu ilə hədələyir. Belə ki, onlar əvvəlcə məlumatları oğurlayır, sonra isə sistemləri şifrələyərək pul tələb edirlər. Qurbanlar ödəniş etməsə, oğurlanmış məlumatların internetdə yayılacağı bildirilir.

Mütəxəssislər kibertəhlükəsizlik tədbirlərinə riayət etməyi, şübhəli e-poçtları açmamağı və proqram təminatını mütəmadi olaraq yeniləməyi tövsiyə edirlər.

Bəsti Rəfizadə