Bakıda marketdə güclü partlayışa səbəb nə olub? – TƏFƏRRÜATLAR
Əvvəlcə partlayış, ardınca güclü yanğın olub.
Sfera.az xəbər verir ki, kadrlar paytaxtın Xəzər rayonu Binə qəsəbəsindəki marketdə baş vermiş hadisədəndir. Səhər saatlarında ''OBA'' marketlər şəbəkəsinin Binə qəsəbəsində fərdi yaşayış evinin birinci mərtəbəsində fəaliyyət göstərən mağazasında partlayış baş verib.
Xəsarət alanlar, marketin əməkdaşları - 45 yaşlı Kəmalə Əhmədova, 38 yaşlı Şəlalə Əsgərova və yoldan keçən kişi hadisə yerinə gələn təcili yardım avtomobili ilə xəstaxanaya aparılıb. TƏBİB-dən verilən məlumata görə, müxtəlif dərəcəli yanıq xəsarətləri alan 3 nəfərə Nərimanov Tibb Mərkəzinin nəzdində fəaliyyət göstərən Yanıq Mərkəzində ilkin müdaxilə edilib. Xəsarət alanlara əl və üz nahiyəsinin II-III dərəcəli yanığı diaqnozu təyin edilib. Onlara zəruri tibbi yardım göstərilib. Vəziyyətləri qənaətbəxş hesab olunan şəxslər ambulator müalicə üçün evə buraxılıblar.
Hadisə yerinə cəlb edilən yanğınsöndürənlər tərəfindən yanğın genişlənməsinə, o cümlədən ikinci mərtəbədə yerləşən evə keçməsinə imkan verilmədən qısa müddətdə söndürülüb. Yanğın nəticəsində ümumi sahəsi 180 kv/m olan mağazanın yanar konstruksiyaları 130 kv/m sahədə yanıb. Mağazanın qalan hissəsi və 2-ci mərtəbədə yerləşən mənzil yanğından mühafizə olunub. Şahidlər deyirlər ki, partlayışın qaz sızmasından baş verdiyi ehtimal edilir.
Xezerxeber.az mövzu ilə bağlı daha ətraflı videomaterialı təqdim edir.
