Qəza ilə bağlı SON MƏLUMATLAR
Qazaxıstanın baş nazirinin müavini Kanat Bozumbayev Aktau şəhəri yaxınlığındakı təyyarə qəzası yerində hökumət komissiyasının işi barədə Baş nazir Oljas Bektenova məlumat verib.
Sfera.az bildirir ki, bu barədə Kazinform İnformasiya Agentliyi məlumat yayıb. Qeyd olunub ki, xilasetmə xidmətləri axtarış işlərini yekunlaşdırıb.
“Çərşənbə günü, dekabrın 25-də Aktau şəhəri yaxınlığında sərnişin təyyarəsinin qəzaya uğraması nəticəsində 38 nəfər həlak olub. Sağ qalan 29 nəfər xəstəxanaya yerləşdirilib, onların hamısı müalicə olunur”, - K.Bozumbayev deyib.
Məlumata görə, Təcili Tibbi Yardım Milli Koordinasiya Mərkəzinin və Qazaxıstanın aparıcı respublika mərkəzlərinin yüksək ixtisaslı mütəxəssisləri Aktauya gəliblər. Eyni zamanda, Rusiya Səhiyyə və Fövqəladə Hallar nazirliklərinin xüsusi təyyarəsi, Azərbaycan Fövqəladə Hallar Nazirliyinin təcrübəli psixoloqları, həkimləri və xilasedicilərindən ibarət qrup “Azərbaycan Hava Yolları” QSC-yə məxsus sərnişin təyyarəsinin qəzaya uğramasından dərhal sonra Aktau şəhərinə yola salınıb.
“Bu gün Rusiyanın təcili tibbi yardım təyyarəsi təyyarə qəzasında yaralanan 9 rusiyalını Moskvaya yola salmaq üçün Aktauya gəlib”, - baş nazir müavini qeyd edib.
Qazaxıstan Baş naziri isə həlak olanların ailələrinə başsağlığı verib. Onun sözlərinə görə, hökumət və səlahiyyətli orqanlar xəsarət alanlara və təyyarə qəzasında həlak olanların ailələrinə lazımi yardım göstərir.
Bundan başqa, Bektenov iştirak edənlərə uçuşların və aviasiya təhlükəsizliyinin təmin edilməsi üçün konkret tədbirlər görməyi tapşırıb. O, hava limanlarının və təyyarələrin gözlənilmədən texniki baxışının keçirilməsinin, həmçinin texniki vəziyyətinin nəzarətə götürülməsinin vacibliyini vurğulayıb.
Qeyd edək ki, çərşənbə günü səhər saatlarında Qazaxıstanın Aktau şəhəri yaxınlığında Bakı-Qroznı reysi ilə uçan Azərbaycan Hava Yollarına məxsus təyyarə qəzaya uğrayıb. Təyyarənin göyərtəsində 62 sərnişin və 5 ekipaj üzvü olmaqla 67 nəfər olub. Sərnişinlər arasında 37 Azərbaycan vətəndaşı olub, onlardan 23-ü ölüb, 14-ü sağ qalıb. Hər üç Qırğızıstan vətəndaşı sağ qalıb. 16 Rusiya vətəndaşı olub, onlardan yeddisi ölüb, doqquzu sağ qalıb. Altı Qazaxıstan vətəndaşının hamısı həlak olub.
Günay
