Bu gecə Respublika Perinatal Mərkəzində baş verən yanğından sonra təhlükəsizlik qaydaları müzakirə obyekti olub.

Bununla bağlı Sfera.az-a danışan təhlükəsizlik məsələləri üzrə ekspert Elmar Nurəliyev deyib ki, yanğın hadisələrindən heç kim sığortalanmayıb:

“Hər bir obyekt sahibi müəssisənin yanğın təhlükəsizliyi standartlarına uyğun təchiz edilməsi, ehtiyat su çəni, yanğın dolabları, xəbərdaredici nəzarət vasitəsiləri ilə təmin edilməsinə, bu təchizatın daim işlək vəziyyətdə olmasına cavabdehdir və buna görə məsuliyyət daşıyırlar.  Təbii ki, xəstəxanaların da ümumi yanğın təhlükəsizliyinə dair tələbləri var. Səhiyyə müəssisələrinin binalarının damında stasionar yanğın pilləkənları, səs pəncərələri və.s saz vəziyyətdə olmalıdır. Palatalarda çarpayılar arasında məsafələr 80 santimetr, əsas mərkəzi keçid hissəsi isə 1 metr 20 santimetrdən az olmamalıdır. Ümumiyyətlə, keçid yerləri stul, çarpayı, hansısa dolabça ilə tutulmamalıdır. Dəhliz, keçid yerlərinə bu tip şeylərin qoyulması qadağandır. Yataq rejimində olan hər beş xəstə üçün ən azı bir xərək nəzərdə tutulmalıdır. Binanın hər mərtəbəsində minimum iki köçürmə çıxışı olmalıdır. Pilləkən qəfəslərində müxtəlif materiallar yığmaq, maneələr yaratmaq olmaz. Binadan çıxış istiqaməti sərbəst olmalıdır. Eyni zamanda işçilərin yanğın təhlükəsizliyi ilə bağlı bilik və bacarıqları artırılmalıdır”.

Müsahibimiz bildirib ki, yanğınların müxtəlif yaranma səbəbləri olur:

“Burada xüsusilə, elektrik qısa qapanması səbəbindən yaranan yanğınlar çoxluq təşkil edir. Ona görə də, səhiyyə müəssisələrində elektrik təsərrüfatına nəzarət edilməli, mütləq sertfikatlaşmış, akkreditasiyası olan şirkətlər tərəfindən elektrik naqillərinin mütəmadi olaraq sazlığı yoxlanmalı, sınaq protokolları tərtib olunmalıdır. Şəbəkəyə qoşulmuş cihazları nəzarətsiz qoymaq olmaz. Bir otaqda 10 ədəddən artıq olmayaraq mərkəzləşmiş qaydada oksigen balonları təşkil edilməlidir. Əgər sayı 10-dan çoxdursa, xəstəxana binasından 20 metrdən az olmayan məsafədə ayrıca binada yerləşdirilməlidir. Bütün orada olan alışma qabiliyyəti yüksək, yanar mayelərin, xüsusilə də, laboratoriya, digər anbarların şkaflarında saxlanmasına görə məsul şəxslər olmalıdır. Yanğının baş verməsi üçün yanar maddə, oksigen və istilik olmalıdır. Bu üç element eyni anda olarsa və təhlükəsizlik qaydalarına riayət edilməzsə, əlbəttə, yanğın hadisəsi qaçılmaz olur”.

Ekspert əlavə edib ki,  uşaq və müalicə müəssisələrində yanğın baş verdikdə hər bir işçinin əsas vəzifəsi insanların həyatını xilas etməkdir:

“Yanğın zamanı müəssisə rəhbəri, eləcə də tibbi heyət bunu təmin etməyə borcludur. Birinci növbədə dərhal FHN-ə məlumat verilməli, yerli könüllü yanğınsöndürmə dəstələri həyəcan siqnalı qaldırmalı, insanları otaqlardan köçürmək üçün bütün tədbirlər həyata keçirilməli, xüsusən də ilk kiçik yaşlı uşaqlar və ağır xəstələr xilas edilməlidir. Hər bir işçi yanğın zamanı necə davranmalı olduğunu əvvəldən bilməlidir və belə hadisələr baş verdikdə uyğun addımlar atmalıdır”.

Xatırladaq ki, yanğın zamanı mərkəzin yenidoğulmuşların intensiv terapiya şöbəsində müalicə alan 4 körpənin meyiti aşkar olunub.

Günay