Xəbər verdiyimiz kimi, gecə Respublika Perinatal Mərkəzində yanğın baş verib. Hadisə zamanı 3 nəfər tüstüdən zəhərlənib, 4 uşaq isə ölüb. Faktla bağlı Baş Prokurorluğun İstintaq idarəsində Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələri ilə cinayət işi başlanıb.

Sözügedən cinayət maddələrinə əsasən, təqsirli şəxs və ya şəxsləri neçə il azadlıqdan məhrumetmə cəzası gözləyir?

Məsələ ilə bağlı hüquqşünas Şamil Paşayev Sfera.az-a bildirib ki, ittihama başqa maddələr də əlavə oluna bilər:

“Cinayət işində hazırki vəziyyətə baxsaq, 225.3 maddəsi üç ilədək müddətə müəyyən vəzifə tutmaq və ya müəyyən fəaliyyətlə məşğul olmaq hüququndan məhrum edilməklə beş ildən on ilədək müddətə azadlıqdan məhrum etmə ilə cəzalandırılır. 314.3 maddəsi isə üç ildən yeddi ilədək müddətə azadlıqdan məhrum etmə ilə cəzalandırılır. İstintaqin gedişində əlavə maddələrlə də şəxslərin ittiham olunması mümkündür”.

Ş.Paşayev sonda əlavə edib ki, təqsirləndirilən şəxs müəyyən olunduqdan sonra zərərçəkmiş şəxslərin maddi və mənəvi iddia qaldırmaq hüquqları var.

Firuzə Əliyeva