Qızla oğlan Bakı-Sumqayıt qatarını daşladılar
Sentyabr ayının 12-də Bakı-Sumqayıt marşrutu ilə elektrik qatarları hərəkətə başlayıb və "Stadler Rail Group" şirkətinin "Stadler Minsk" zavodunda istehsal olunmuş yüksək komfortlu ikimərtəbəli elektrik qatarları sərnişinlərin istifadəsinə verilmişdir.
Sfera.az bildirir ki, "Azərbaycan Dəmir Yolları" Qapalı Səhmdar Cəmiyyətinin Mətbuat Katibliyinin rəisi Nadir Əzməmmədov Trend-ə deyib ki, amma təəssüflər olsun ki, bəzi vətəndaşlarımız özlərinin normalara sığmayan davranışı ilə sərnişinlərin və elektrik qatarlarının təhlükəsiz hərəkətinə mane olurlar.
3 may 2016-cı ildə saat 18.15 radələrində Sumqayıtdan Bakıya hərəkət edən elektrik qatarı Keşlə-Bakı mənzilində olarkən iki nəfər tərəfindən daşlanarkən DİN Nəqliyyatda Baş Polis İdarəsinin Bakı-yük stansiyasındakı xətt polis məntəqəsinin rəisi, polis leytenantı Nadir Məmmədov və polis nəfəri Bəhruz Ağayev tərəfindən saxlanılmışdır.
Araşdırma zamanı məlum olmuşdur ki, saxlanılanlar Nərimanov rayonu 7 saylı liseyin şagirdləri - 22. 04.1999-cu il təvəllüdlü Elnur Fazil oğlu Baxşıyev və 01.01. 1998-ci il təvəllüdlü Lalə Şair qızı Ağayevadır.
Saxlananların valideynləri də Nəqliyyatda Baş Polis İdarəsinə dəvət olunmuş, azyaşlılar dindirilərkən hadisəni törətdiklərini etiraf etmişlər. Polis əməkdaşları saxlanılanlarla maarifləndirici və profilaktiki söhbətlər aparmış, xəbərdarlıq etmiş və sərbəst buraxmışlar.
Xoşbəxtlikdən, sərnişinlərə və elektrik qatarına ziyan dəyməmişdir.
Bir daha Bakı-Sumqayıt-Bakı marşrutu üzrə yaxın ərazıdə yaşayan vətəndaşların nəzərinə çatdırmaq istəyirik ki, dövlət əmlakına ziyan vuranlar, elektrik qatarının təhlükəsiz hərəkətinə mane olanlara qarşı hüquq-mühafizə orqanları tərəfindən müvafiq tədbirlər görüləcək.
