Bakıda batutda tullanma üzrə Dünya Kubokunun açılış mərasiminin məşqi keçirilib - FOTO
Milli Gimnastika Arenasında batutda tullanma üzrə Dünya Kubokunun açılış mərasiminin, eləcə də Azərbaycan idmançılarının yoxlama məşqi keçirilib.
Martın ilk həftəsi Bakıda batut gimnastikası üzrə Beynəlxalq Gimnastika Federasiyasının (FIG) dünya kuboku yarışları keçiriləcək.
Sfera.az bildirir ki, Trend Azərbaycan Gimnastika Federasiyasının rəsmi saytına istinadla xəbər verir ki, yarışlar əcnəbi gimnastların daimi təlim-məşq toplanışı məkanına çevrilmiş Milli Gimnastika Arenasında təşkil olunacaq.
Azərbaycanda 2013-cü ilin sonundan inkişaf etməyə başlayan batut gimnastikası üzrə dünya kuboku ölkəmizdə ilk dəfədir təşkil olunur.
Olimpiya ilinin batut gimnastikası üzrə ilk yarış mövsümünün açılışını edən kubokda Avropa ilə yanaşı, uzaq Şərq ölkəsi Yaponiya, Okeaniya ölkəsi Avstraliya, eləcə də Atlantik okeanının sahillərindən ABŞ-ı təmsil edən idmançılar iştirak edəcək.
Ümumilikdə, yarışlarda 18 ölkədən 78 gimnast fərdi və sinxron çıxış proqramında mübarizə aparacaq. Bunlardan 46-sı kişi, 32-si isə qadındır.
Batut gimnastikası üzrə Azərbaycan yığma komandasının lideri, ilk Avropa Oyunlarının bürünc medalçısı İlya Qrişuninlə yanaşı, ölkəmizi yarışlarda açıq ölkə çempionatının qızıl medalçısıOleq Piunov, Dmitriy Fedorovskiy və Ruslan Ağamirov, həmçinin zərif cinsin nümayəndələri - İlk Avropa Oyunlarının finalçısı Svetlana Makştarova və Sabina Zaytseva təmsil edəcəklər.
İlk günündə təsnifatı keçirilən yarışlar bir gün sonra finallarla yekunlaşacaq.
Yarış vaxtı izləyicilər də diqqətdən kənarda qalmayacaq. İdmançılara azarkeşlik edəcək tamaşaçılar yarışlar boyunca müxtəlif maraqlı müsabiqələrdə iştirak edərək, təşkilatçıların hazırladığı hədiyyələrə sahib olacaqlar.
Trend oxuculara batutda tullanma üzrə Dünya Kubokunun açılış mərasiminə hazırlıq məşqlərindən, eləcə də Azərbaycan idmançılarının yoxlama məşqindən fotoları təqdim edir.
