Bako Saakyanı da Köçəryanla Sarkisyanın taleyi gözləyir-deputat
14:58 / 06.03.2019
4099
"Serj Sarkisyan, ardınca qondarma rejimin rəhbəri Bako Saakyanın da həbsi gözləniləndir”
Sfera.az-a açıqlamasında bu sözləri son günlər qondarma "dqr” Saakyanla ona müxalif olanlar arasında yenidən savaşın qızışmasına münasibət bildirərkən Milli Məclisin deputatı, politoloq Elman Nəsirov deyib:
"Paşinyanla qondarma Dağlıq Qarabağdakı rejim rəhbəri Bako Saakyan arasında ciddi ixtilaflar mövcuddur. Paşinyan dərk edir ki, hakimiyyəti üçün ciddi təhlükə mənbəyi Dağlıq Qarabağ klanıdır. Klanın rəhbərləri olan Robert Köçəryan həbs edilib, hətta Serj Sarkisyana qarşı da cinayət işi başlanılıb. Dağlıq Qarabağda həmin klanın hakimiyyətdə olan əsas siması Bako Saakyan hesab olunur. Ermənistandakı parlament seçkisi öncəsi Paşinyan Saakyana barmaq silkələyərək bildirmişdi ki, nədən onun oğlu Dağlıq Qarabağda hərbi xidmətdədir, amma separatçı rejim rəhbərlərinin övladları ümumiyyətlə hərbi xidmətdən yayınırlar. Həmçinin, Paşinyan Saakyanı Ermənistanda keçirilən parlament seçkilərinə müdaxilədə və pozuculuq mövqeyində dayanmaqda ittiham edib. Məsələyə bu kontekstdə yanaşdıqda, yaxın zamanlarda Serj Sarkisyanın da həbsinin şahidi ola bilərik. Bunun ardınca Saakyana qarşı təzyiqlərin artaraq, onun da həbs edilməsi gözləniləndir. Ona görə də yaxın zamanlarda Saakyana qarşı da yeni, daha ciddi ittihamların ortaya çıxacağını görə bilərik. Paşinyan bu məsələdə qətiyyətli olmasa "Qarabağ klanı” yenidən revanş götürə bilər”.
Qeyd edək ki, artıq bir həftəyə yaxındır qondarma "dqr”da yenidən hakimiyyətdaxili savaşa start verilib. Bako Saakyanın əleyinə imza toplamağa başlayan qondarma rejimin təhlükəsizlik şurasının baş katibi, general Vitali Balasanyan hakimiyyəti ələ keçirmək istəyir.
ELÇİN
