Yay mövsümü yolları daha da canlandırır. İstirahət səfərləri, turizm axını və hava şəraitinin təsiri ilə nəqliyyat hərəkətində həm sıxlıq artır, həm də yol hərəkəti qaydalarının pozulması halları çoxalır.

Sfera.az xəbər verir ki, yay aylarında dünyada ən çox qeydə alınan qayda pozuntuları sırasında sürət həddinin aşılması birinci yerdədir. Sürücülər xüsusilə şəhərlərarası magistral yollarda daha sürətli hərəkət edir və bu, qəzaların əsas səbəblərindən biri sayılır.

Bundan əlavə, avtomobili sərxoş halda idarəetmə, təhlükəsizlik kəmərindən istifadə etməmək, motosiklet və skuterlərdə dəbilqəsiz hərəkət, uşaqlar üçün xüsusi oturacaqların olmaması, qəzadan sonra lazımi işarələrin qoyulmaması kimi hallar da yayda yol polisinin sıx qarşılaşdığı pozuntular arasındadır.

ABŞ-də yay aylarında, xüsusilə iyul və avqustda gənc sürücülər arasında qəza halları pik həddə çatır. NHTSA-nın məlumatına görə, bu dövrdə sürət həddinin aşılması və diqqətsiz sürücülük (telefonla danışmaq, mesaj yazmaq və s.) əsas səbəblər arasındadır.

Almaniyada yayda texniki baxışdan keçməyən avtomobillərlə yola çıxmaq, avtomobildə zəruri təhlükəsizlik vasitələrinin (ilk yardım çantası, xəbərdarlıq üçbucağı) olmaması problemə çevrilir.

Türkiyədə isə xüsusilə Aralıq və Egey bölgələrinə istirahətə gedən vətəndaşların sıxlığı səbəbilə yol qəzaları artır. Yol polisi bu bölgələrdə sıx nəzarət tədbirləri həyata keçirir.

Fransa və Rusiya da yay aylarında yol hərəkəti qaydalarının pozulması səbəbilə maarifləndirmə kampaniyalarını gücləndirən ölkələr sırasındadır. Fransa içkili sürücülərə qarşı ciddi yoxlamalar həyata keçirir. Rusiyada isə yay qəzalarının sayı 30-40 faizədək artır.

Yol hərəkəti üzrə ekspertlərin fikrincə, isti hava şəraiti sürücülərin daha tez əsəbiləşməsinə, diqqətinin yayınmasına səbəb olur ki, bu da qəza riskini artırır.

Yay fəsli nə qədər istirahət və səyahət dövrü kimi görünsə də, həm də sürücülər üçün daha diqqətli və məsuliyyətli olmağı tələb edir. Yol polisi sürücüləri yola çıxmazdan öncə avtomobillərinin texniki vəziyyətini yoxlamağa, sürət həddinə əməl etməyə və sərxoş halda sükan arxasına keçməməyə çağırır.

Firuzə Əliyeva
Sfera.az

Yay aylarında avtomobil qəzaları bu səbəblə olur