ADA Universitetində Mətbuatın 150 illiyinə həsr olunan təlim keçirilir

İyunun 20-də ADA Universitetində Azərbaycan Media İnkişafı Agentliyinin təşkilatçılığı ilə mətbuatın 150 illiyinə həsr olunan təlim keçirilir. Tədbirdə media nümayəndələri, jurnalistlər iştirak edirlər.

Sfera.az xəbər verir ki, təlimin açılışında Media İnkişafı Agentliyinin İcraçı direktorunun müavini Natiq Məmmədli fikirlərini bildirib.

O qeyd edib ki, mətbuatın yaradılması günü media işçilərinin doğumgünüdür:

"Hamımız üçün ən önəmli gün ad günüdür. Hər kəs yol gözləyir ki, kim onu təbrik edəcək. Amma insanın ad gününü unutmayanlar – onun doğmalarıdır. Bu gün də bizim doğum günümüzdür – Azərbaycan mətbuatının doğum günü. Bu gün mətbuatın 150 illik yubileyidir”. 

Təlimdə jurnalistikanın tarixi və dünya mətbuatının inkişaf mərhələləri, media etikası, eləcə də Azərbaycan mediasında son illər və aylar ərzində baş vermiş real hadisələr praktiki müzakirə edilir. Tədbir interaktiv formatda təşkil olunub və jurnalistlərlə qarşılıqlı fikir mübadiləsi şəklində davam edir.

Qeyd edək ki, təlim iki mərhələdə keçirilir: birinci mərhələ 19 iyunda baş tutub, ikinci mərhələ isə bu gün – 20 iyun tarixində davam edir. Tədbirin əsas məqsədi jurnalistlərin peşəkar inkişafına töhfə vermək və media sahəsindəki aktual məsələləri müzakirə etməkdir.

Bəsti Rəfizadə
Sfera.az