7 iyun – Ümumdünya Qida Təhlükəsizliyi Günüdür
Bu gün dünyada Ümumdünya Qida Təhlükəsizliyi Günü qeyd olunur.
Sfera.az xəbər verir ki, 2018-ci ildə BMT-nin Baş Assambleyasının qərarı ilə təsis olunan bu gün hər il 7 iyunda qeyd olunur.
Qida təhlükəsizliyi təkcə sağlamlığın deyil, həm də davamlı inkişafın və iqtisadi sabitliyin əsas sütunlarından sayılır.
2025-ci ilin devizi – “Təhlükəsiz qida – sağlam gələcək üçün birgə fəaliyyət” adlanır. Bu çağırış bütün dünyada olduğu kimi, Azərbaycanda da səslənir. Qida Təhlükəsizliyi Agentliyi tərəfindən bu münasibətlə ölkə üzrə maarifləndirici tədbirlər, ictimai görüşlər və açıq dərslər təşkil olunur. Məqsəd – vətəndaşlarda qida təhlükəsizliyi ilə bağlı bilik və məsuliyyət hissini artırmaqdır.
Rəsmi statistikaya görə, hər il dünyada milyonlarla insan təhlükəli və gigiyenik olmayan qida səbəbindən sağlamlıq problemləri yaşayır. Mütəxəssislər bildirirlər ki, bu riskin qarşısını almağın yeganə yolu istehsaldan süfrəyə qədər bütün mərhələlərdə təhlükəsizlik standartlarına riayət olunmasıdır.
Son illər Azərbaycanda bu sahədə ciddi irəliləyişlərə nail olunub. Xüsusilə də idxal və ixrac proseslərində laborator nəzarətin gücləndirilməsi, ərzaq məhsullarının izlənəbilən sistemlə təmin olunması və ictimai iaşə obyektlərində yoxlamaların intensivləşdirilməsi mühüm nəticələr verib.
Firuzə Əliyeva
Sfera.az
