Azərbaycan fikrini qətiləşdirdi - “JF-17" qırıcılarının idxalı artırılacaq

Azərbaycan “JF-17 Thunder Block III” qırıcılarının sifarişini genişləndirərək Hərbi Hava Qüvvələrini ciddi şəkildə gücləndirməyə hazırlaşır.

Sfera.az xəbər verir ki, bu sözləri siyasi şərhçi Elçin Əlioğlu xarici mediaya istinadən bildirib.

E.Əlioğlu qeyd edib ki, əvvəlcə Azərbaycan Pakistan və Çin istehsalı olan bu müasir çoxməqsədli təyyarələrdən 16 ədəd almaq üçün müqavilə bağlayıb. Siyasi şərhçinin sözlərinə görə, Azərbaycan sonradan fikrində dəyişiklik edib: 

“Lakin təsdiqlənməmiş mənbələr sifarişin 40 qırıcıya qədər artırıla biləcəyini bildirir. Məlumatlara görə, sövdələşmənin ümumi dəyəri 4,2 milyard dollar təşkil edir. “JF-17 Thunder Block III” qırıcılarının alınması ilə bağlı ilkin razılaşma 2024-cü ilin fevralında rəsmiləşdirilib və həmin ilin oktyabrına qədər onların Azərbaycanın Hərbi Hava Qüvvələrinin tərkibinə inteqrasiyası təsdiqlənib. 1,6 milyard dollar dəyərindəki bu müqavilə, “The Defense Post”un yazdığına görə, Azərbaycanın hərbi potensialının, xüsusilə də hava gücünün modernləşdirilməsi yolunda mühüm addım olub”.

E.Əlioğlu bildirib ki, “JF-17” qırıcıları mövcud aviaparkı əvəz etmək üçün deyil, Hərbi Hava Qüvvələrinin döyüş qabiliyyətini artırmaq məqsədilə nəzərdə tutulub:

“Azərbaycan tarixən Sovet dövrünə aid “MiQ-29” və “Su-25” kimi qocalmış təyyarələrdən istifadə edib. Bu köhnə platformalar hələ də istifadəyə yararlı olsa da, “JF-17 Block III”un təqdim etdiyi qabaqcıl avionika, silah sistemləri və çoxməqsədlilik imkanlarından məhrumdurlar.

Pakistan Aerokosmik Kompleksi və Çin Xengdü Təyyarə Sənayesi Qrupu tərəfindən hazırlanmış “JF-17”, “F-16” və ya “Eurofighter Typhoon” kimi bahalı Qərb təyyarələrinə nisbətən daha sərfəli alternativdir. Bundan əlavə, təyyarənin Türkiyənin qabaqcıl “hava-hava” raketləri olan “Gökdoğan” və “Bozdoğan” da daxil olmaqla geniş sursat spektri ilə uyğunluğu, onu Azərbaycan üçün daha da cəlbedici edir”.

Xatırladaq ki, “JF-17 Thunder Block III” qırıcıları Pakistan-Hindistan müharibəsində öz üstün keyfiyyətləri ilə seçilib. Pakistan ordusunun Hindistanla hava döyüşündə üstünlük əldə etməsində bu təyyarələrin böyük rolu olub. Məhz “JF-17 Thunder Block III” vasitəsilə Hindistana məxsus olan və Fransa, Rusiya istehsalı olan bir neçə təyyarə məhv edilmişdi. Bu müharibədən sonra “JF-17 Thunder Block III” təyyarələrinə maraq artıb.    

Firuzə Əliyeva
Sfera.az