Rusiya Elmlər Akademiyasının Kosmik Tədqiqatlar İnstitutunun Günəş Astronomiyası Laboratoriyası və Günəş-Yer Fizikası İnstitutunun verdiyi məlumata əsasən, Günəşdə yaranan iri tac dəliyi nəticəsində Yer kürəsində maqnit qasırğası qeydə alınıb.

Sfera.az xarici mediaya istinadən xəbər verir ki, rəsmi açıqlamaya görə, Yer artıq həmin ən üst atmosfer təbəqəsindən gələn plazma axınlarına daxil olmağa başlayıb. Səhər saatlarında isə ilk maqnit qasırğası müşahidə olunub. Bu qasırğa Bakı vaxtı ilə saat 05:00-dan 09:00-a qədər davam edib və qısa müddətli olsa da, gücü 5 ballıq şkala üzrə G2.3 səviyyəsinə çatıb. Alimlər bu göstəricini tac dəliyi üçün “yetərincə yüksək” hesab edirlər.

Hazırda Günəş küləyinin sürəti 500 km/saniyəyə yaxındır ki, bu da orta göstəricidən (400 km/s) yüksəkdir. Planetlərarası maqnit sahəsinin gücündə də kəskin artım müşahidə olunur – əvvəlki göstəricilərlə müqayisədə 3-4 dəfə çoxdur. Yer ətrafındakı qazın temperaturu da üç dəfə artaraq 300 min dərəcəyə çatıb.

Bununla belə, elm adamları peyklərin təhlükə altında olmadığını vurğulayır. “Yüksək temperatur müşahidə olunsa da, kosmosda istilik keçiriciliyi sıfıra bərabərdir, buna görə də peyklər nə qızacaq, nə də zədələnəcək”, – deyə bildirilib.

Alimlər yeni şəraitin ən azı iki gün davam edəcəyini, hətta bu müddətin daha uzun ola biləcəyini istisna etmirlər. Tac dəliyinin sürətlə böyüməsi bu ehtimalı gücləndirir.

“Hazırda həftə sonu üçün proqnoz xəritələrində sarı rənglər üstünlük təşkil edir, lakin vəziyyət getdikcə qırmızı rəngə doğru dəyişir. Axşama doğru isə qütb işıqlarının yaranma ehtimalı ilə bağlı daha dəqiq məlumat veriləcək”, – deyə açıqlamada qeyd olunub.

Fidan Hacızadə
Sfera.az

Maqnit qasırğası 2 gün davam edəcək - DİQQƏT