13 yaşında hamilə qalan qızla bağlı - AÇIQLAMA
Ağcabədidə 13 yaşlı qız 24 yaşlı kişidən uşaq dünyaya gətirib. "Azərbaycan Uşaqları” İctimai Birliyinin sədri Kəmalə Ağazadənin iddialarına görə həmin şəxsə 6 il azadlıqdan məhrumetmə cəzası verilib, lakin onun cəzası şərti hesab olunub və 1 il sınaq müddəti təyin edilməklə Bakı İstintaq Təcridxanasından azadlığa buraxılıb. Həmin şəxs 13 yaşlı qızla bir evdə yaşayır və qız 18 yaşa çatdıqdan sonra onunla evlənməyi gözləyir. Ailəsi isə qızdan imtina edib.
Sfera.az xəbər verir ki, məsələ ilə bağlı Ağcabədi Rayon İcra Hakimiyyətindən Teleqraf-a bildirilib ki, baş verən hadisə icranın nəzarətindədir:
“Bununla bağlı İcra Hakimiyyəti tərəfindən tədbirlər görülür. Bu, ötən ildən davam edən prosesdir. Qanunvericiliyə uyğun tədbirlər görülüb. Məlumatları Ailə, Qadın və Uşaq Problemləri üzrə Dövlət Komitəsinə verəcəyik. Hazırda qeyri-iş günləri olduğu üçün mətbuata dəqiq məlumat verə bilmirik”.
Ailə, Qadın və Uşaq Problemləri üzrə Dövlət Komitəsinin Uşaq məsələləri şöbəsinin məsləhətçisi Bahar Həsənli Teleqraf-a açıqlamasında bildirib ki, Ağcabədi rayonunda 13 yaşlı qızın hamilə olması ilə bağlı Komitə tərəfindən Rayon İcra Hakimiyyəti və Daxili İşlər Nazirliyi ilə birlikdə dərhal müvafiq tədbirlər görülüb.
"Komitədən Ağcabədi Rayon İcra Hakimiyyəti ilə əlaqə saxlanılıb. Tərəflər icra hakimiyyətinə dəvət olunublar və onlarla söhbət aparılıb. Hazırda 13 yaşlı qız riskli hamiləlik yaşayır və daim yoxlanışdan keçirilir. Hazırda məsələ Komitənin, İcra Hakimiyyətinin və Daxili İşlər Nazirliyinin nəzarətindədir",- deyə B.Həsənli bildirib.
Komitə rəsmisi əlavə edib ki, 13 yaşlı yeniyetmədən ailəsi imtina edib: "Bu səbəbdən o, qeyri-rəsmi ailə qurduğu oğlanın ailəsi ilə birlikdə yaşayır".
