ABŞ bəzi əcnəbi tələbələri deport edəcək - Yeni araşdırma başlanılıb
ABŞ-nin Dövlət Katibi Marko Rubio HƏMAS-ı dəstəkləyən xarici tələbələrin vizalarını ləğv edəcəklərini bildirib.
Sfera.az "Milliyet"ə istinadən xəbər verir ki, bu barədə Mark Rubio “X” sosial media platformasında paylaşım edib.
Mark Rubio HƏMAS-ı “terror təşkilatı” kimi xarakterizə edərək deyib:
“Terror təşkilatlarını dəstəkləyən şəxslər milli təhlükəsizliyimizə təhdiddir. ABŞ terrorçuları dəstəkləyən xarici ziyarətçilərə qarşı sıfır tolerantlıq prinsipinə malikdir”.
O vurğulayıb ki, xarici tələbələr də daxil olmaqla, ABŞ qanunlarını pozanlar viza rəddi, ləğvi və ya deportasiya ilə üzləşə bilərlər.
ABŞ Dövlət Departamentində adının açıqlanmasını istəməyən yüksək səviyyəli rəsmilər bu məsələdə Rubionun xüsusi araşdırma aparacağını qeyd ediblər. Keçmiş ABŞ prezidenti Co Bayden administrasiyasının bu məsələni görməzdən gəldiyini və heç kimin vizasının ləğv edilmədiyini iddia edən rəsmilər, Rubionun ABŞ qanunlarını pozan xarici tələbələrin vizalarını ləğv etmək üçün süni intellekt dəstəkli bir iş aparacağını bildiriblər.
“Yaxala və ləğv et” adlı bu araşdırma çərçivəsində on minlərlə xarici tələbənin sosial media hesabları süni intellekt vasitəsilə yoxlanılacaq. Bu prosesdə 7 oktyabr 2023-cü ildə baş verən hadisələrə dair HƏMAS-a dəstək ifadələri axtarılacaq. Rəsmilər həmçinin İsrail əleyhinə keçirilən etiraz aksiyalarına dair xəbərlərin və yəhudi tələbələr tərəfindən açılan məhkəmə işlərinin də araşdırılacağını bildiriblər.
ABŞ Prezidenti Donald Tramp isə 30 yanvar tarixində Fələstinə dəstək aksiyalarında iştirak edən tələbələrin deportasiyasına yol aça biləcək “antisemitizmlə mübarizə” mövzusunda prezident fərmanı imzalayıb.
Bəsti Rəfizadə
