“Erasmus+” proqramı çərçivəsində bütün fəaliyyətlər faktiki olaraq dayandırılıb.

Sfera az xəbər verir ki, bunu Milli Erasmus ofisinin rəhbəri Pərviz Bağırov öz paylaşımında bildirib.

O yeni layihələrin qeydiyyatının və mövcud layihələrin icrasının dayandırıldığını qeyd edib. "Əziz dostlar və həmkarlar, son vaxtlar “Erasmus+” proqramı ilə bağlı mənə çoxlu zənglər və mesajlar gəlir. Bütün suallara cavab verməyə çalışsam da, vəziyyətin ümumi izahatını vermək istərdim. Təəssüf ki, “Erasmus+” proqramında bütün fəaliyyətlər qeyri-rəsmi olaraq dayandırılıb. Bu o deməkdir ki, ICM-in yüzlərlə tələbə-müəllim mübadiləsi, CBHE (Amplifying Potential in Higher Education) layihələri, Jean Monnet təşəbbüsləri və digər “Erasmus+” layihələri üzrə heç bir irəliləyiş yoxdur".

P.Bağırov, həmçinin, Milli Erasmus Ofisinin də bağlanmaq üzrə olduğunu qeyd edərək, bu vəziyyətin proqramın gələcəyi üzərində ciddi təsir yaradacağını bildirib. O, “Erasmus+” layihələrinin Azərbaycanda bir çox yenilikçi layihələrə həyat verdiyini, minlərlə tələbə və müəllimin Avropa universitetlərində təhsil aldığını və ölkənin ali təhsil sisteminin Avropa təhsil sahəsinə inteqrasiyasının sürətləndiyini qeyd edib. Bağırov, hal-hazırda dayandırılan 27 layihənin məzmununu da açıqlayıb. Bu layihələr arasında Azərbaycandakı universitetlərdə araşdırma imkanlarını genişləndirmək, alternativ enerji mənbələri və iqlim dəyişikliyi məsələlərinə yeni yanaşmalar təqdim etmək, enerji səmərəliliyini artırmaq və rəqəmsal transformasiyanı dəstəkləmək kimi mühüm layihələr yer alır. Proqramın ümumi büdcəsinin 20 milyon manat olduğunu qeyd edən Pərviz Bağırov, bu layihələrin dayandırılmasının Azərbaycanın ali təhsil sektoru və beynəlxalq əməkdaşlıq üçün ciddi təsir yaradacağını bildirib.

O, həmçinin, “Erasmus+” proqramına Azərbaycandakı 32 müxtəlif ali təhsil müəssisəsinin qatıldığını və Avropa universitetləri ilə akademik əməkdaşlığın bu layihələr vasitəsilə inkişaf etdiyini qeyd edib. Pərviz Bağırov, bütün müvafiq qurumlara vəziyyət barədə məlumat verdiklərini və problemin həlli üçün çalışıldığını bildirib.

Bəsti Rəfizadə

““Erasmus+” proqramı fəaliyyətini dayandırıb” - Ofis rəhbəri