Ramazan ayında düzgün qidalanma sağlam qalmaq və enerjili olmaq üçün vacibdir. Səhv qidalanma vərdişləri mədə problemlərini artıra və Ramazan ayında oruc tutmağı çətinləşdirə bilər.

Ramazanda oruc tutanlar necə qidalanmalıdır? Sahur və iftar zamanı nələrə diqqət edilməlidir? Kimlərə oruc tutmaq riskli ola bilər?

Mövzu ilə bağlı Sfera.az-a açıqlama verən dietoloq Alidə İbrahimova oruc tutan şəxslərin sahur və iftarda nələrə diqqət etməli olduğunu, həmçinin mədə problemləri və xroniki xəstəlikləri olanlar üçün tövsiyələrini verib.

Mütəxəssisin sözlərinə görə, sahura qalxmaq orqanizmin enerji ehtiyacını qarşılamaq üçün mütləqdir: “Uzun müddət ac qalmaq qan şəkərinin düşməsinə, halsızlıq və yorğunluğa səbəb ola bilər. Buna görə də sahuru mütləq etmək lazımdır. Xüsusilə zülallı qidalara üstünlük verilməlidir. Çünki protein tərkibli qidalar gec həzm olunduğuna görə uzun müddət tox saxlayır. Bununla yanaşı, tərəvəzlər və sağlam yağlar da menyuda olmalıdır.”

Dietoloq qeyd edib ki, sahurda duzlu və qızardılmış qidalardan uzaq durmaq vacibdir: “Duzlu qidalar susuzluğu artırır, qızartmalar isə həzmi çətinləşdirir. Şəkərli məhsullar da qan şəkərinin sürətlə yüksəlməsinə və daha sonra düşməsinə səbəb olduğu üçün tövsiyə edilmir.”

A.İbrahimova bildirib ki, iftar zamanı ilk olaraq sulu yeməklərə, tərəvəz şorbalarına üstünlük verilməlidir. Onun sözlərinə görə, uzun müddət ac qalan mədəyə ağır qidalarla yüklənmək həzm problemlərinə səbəb ola bilər: “İftarı su və ya xurma ilə açmaq məsləhətdir. Ardınca sulu yeməklər qəbul edilməlidir. Ağır yeməklər mədəyə zərər verə bilər. Ağ undan hazırlanmış məhsullardan, çox yağlı və qızardılmış yeməklərdən uzaq durmaq lazımdır. Su içərkən isə birdən-birə çox miqdarda qəbul etmək düzgün deyil. Qurtum-qurtum içmək daha yaxşıdır.”

A.İbrahimova bildirib ki, yeməkdən dərhal sonra çay və qəhvə içmək həzm sisteminə mənfi təsir göstərir, xüsusilə də ət yeməklərindən sonra bu içkilərdən çəkinmək məsləhətdir. Hazırda qastrit və reflü xəstəliklərinin geniş yayıldığını vurğulayan Alidə İbrahimova bildirib ki, bu problemi olan şəxslər oruc tutarkən daha diqqətli olmalıdır: “Turşuluğu artıran qidalardan uzaq durmaq lazımdır. Turş meyvələr, qazlı içkilər, çox ədviyyatlı yeməklər mədə turşuluğunu artırır. Ağır və yağlı yeməklər isə mədə yanmasını daha da artırır.”

Müsahibimiz şəkərli diabet və yüksək təzyiq problemi olan şəxslərin də sahur və iftar zamanı diqqətli qidalanmalı olduğunu bildirib: “Şəkər xəstələrinin boşqabında mütləq tərəvəz olmalıdır. Əgər yaş 40-dan yuxarıdırsa, xüsusilə bişmiş tərəvəzlərə üstünlük verilməlidir. Tərkibində sağlam yağlar olan qidalar – zeytun yağı, avokado yağı, kərə yağı – menyuda olmalıdır.”

Dietoloqun sözlərinə görə, hamilə və süd verən anaların oruc tutub-tutmaması fərdi yanaşma tələb edir. Əgər oruc tuturlarsa, onların menyusunda D vitamini və kalsiumla zəngin qidalar olmalıdır: “Süd və süd məhsulları, balıq, yumurta, qaraciyər kimi qidalar qəbul edilməlidir. Bundan əlavə, sağlam yağlara - zeytun yağı, kərə yağı, avokado yağına üstünlük verilməlidir. Şirniyyat və ağ undan hazırlanmış məhsullardan uzaq durmaq vacibdir.”
Dietoloq bildirib ki, düzgün qidalanma qaydalarına əməl etməklə orucu sağlam və enerjili keçirmək mümkündür.

Bəsti Rəfizadə

Oruc tutanlar necə qidalanmalıdır? - Dietoloqdan vacib tövsiyələr