Quterreş təyyarə qəzası ilə bağlı başsağlığı verdi

BMT-nin Baş katibi Antonio Quterreş Azərbaycan Hava Yollarına məxsus sərnişin təyyarəsinin qəzaya uğraması ilə bağlı başsağlığı verib.

Sfera.az xəbər verir ki, bu barədə BMT-nin rəsmi saytı məlumat yayıb.

“Baş katib, Qazaxıstanın qərbində baş vermiş və Azərbaycan, Qazaxıstan, Qırğız Respublikası və Rusiya Federasiyasının vətəndaşları da daxil olmaqla, çoxlu sayda insanın həlak olmasına səbəb olmuş təyyarə qəzası xəbərindən dərin kədər hissi keçirir.

O, həlak olanların ailələrinə dərin hüznlə başsağlığı verir və hadisədən təsirlənmiş ölkələrlə həmrəyliyini ifadə edir. Baş katib, həmçinin bu faciəvi hadisədə yaralananların tez və tam şəkildə sağalmasını arzulayır”, - bəyanatda bildirilir.