Niyə balinalar qayıqlara vəhşicəsinə hücum edir?

Bu il balinaların qayıqlara hücumlarının ardı-arası kəsilməyib.
 

Sfera.az bildirir ki, sonuncu belə hücum yırtıcıların qəribə davranışlarına nəyin səbəb olduğu ilə bağlı sualları yenidən gündəmə gətirib.
 

Qeyd edək ki, balinaların son hücumu ötən ayın sonu Cəbəllütariq boğazında Polşa yaxtasına olub. Hücum düz 45 dəqiqə davam edib. Bu müddət ərzində balinalar dəfələrlə gəmiyə hücum ediblər, nəticədə gəmi batıb.
 

Xoşbəxtlikdən Mərakeş Hərbi Dəniz Qüvvələri qəza siqnalına dərhal cavab verib. Onlar ekipajı təhlükəsiz yerə apara bilsələr də, qayıq limana gedən yolda batıb.
 

İntellektləri və aqressivliyi ilə tanınan balinaların bu davranışının motivləri hələ də aydın deyil. Yırtıcı balinaların Cəbəllütariq boğazında yelkənli qayıqlara ilk hücumları hələ 2020-ci ildə başlayıb. Lakin o vaxtdan bəri balinalar hücumlarını xeyli “təkmilləşdiriblər”. Belə ki, müxtəlif hallarda balinalar müxtəlif taktikalardan istifadə ediblər. Bəzən qayıqlara yüngül toxunmaqla kifayətlənib, digərlərində isə özlərini daha amansız aparıblar.
 

Adi insanlar bu hücumları aqressiv davranış kimi qəbul etsə də, mütəxəssislər buna daha mürəkkəb davranışın əlaməti kimi baxılmasının tərəfdarıdır. Xüsusilə, bəzi tədqiqatçılar əmindirlər ki, bu yolla yırtıcı balinalar əslində “hiperaktiv sosial davranış” nümayiş etdirirlər.
 

Alimlər inanırlar ki, bu əslində müxtəlif yırtıcı balina sürülərinə virus kimi yayılan bir növ çağırışdır. Alimlər hesab edirlər ki, balinalar qəsdən qayıqlara hücum etmirlər. Yəni, balinalar əslində insan qanına susamayıblar.
 

Balinaların Cəbəllütariq boğazında qayıqlara ilk hücumlarının ehtiyatlı davranışlarının təzahürü olduğuna dair bir fərziyyə var. Ehtimal olunur ki, dişi balinalardan biri qayıqla toqquşma nəticəsində yaralanıb. Buna görə də o, hücum etməyə başlayıb, sonra isə bu davranışı öz qrupundakı başqa balinalara da öyrədib.
 

Mütəxəssislər balina davranışını başa düşməyin vacib olduğunu təkid edirlər. Onlar baş verənləri səhv anlamağın son nəticədə insanlardan lazımsız qisas almağa səbəb ola biləcəyindən narahatdırlar.

Aynil

Sfera.az