Dəhşətli QƏTLİN üzə çıxardığı suallar - Polis hansı hallarda evə girə bilər? - Şərh
Gündəm
12:30 / 21.02.2022
1277
Xəbər
verdiyimiz kimi, ötən gün Bakıda ana və iki övladı münaqişə zəminində
öldürülüb. Evdə səs-küylə əlaqədar olaraq, qonşular ərazi yerinə polis əməkdaşlarını
çağırıb. Lakin sakinlərin dediklərinə görə, polis xidmətinin işçiləri bunu
ailədaxili məsələ olaraq qiymətləndirərək, sakinlərə prosesə qarışmamalı
olduğunu deyib.
Şəxsi
mənzildə səs-küy, zorakılıq halı müşahidə edildikdə, polis əməkdaşlarının müdaxiləsi
ilə bağlı məsələnin hüquqi tərəfini şərh edən vəkil Elmir Murquzov Sfera.az-a
açıqlama verib.
Vəkil
bildirib ki, polislər qanunvericiliyə uyğun olaraq, həmin münaqişəyə müdaxilə
edə bilər:
"Polis
əməkdaşlarının məhkəmə qərarı olmadan yaşayış evinə daxil ola biləcəyi və
müdaxilə edə biləcəyi qanunla müəyyən edilmiş qaydada təmin olunur. "Polis
haqqında" Azərbaycan Respublikası qanununun 24-cü maddəsi ilə həmin hallar
tənzimlənir.
Polis
əməkdaşlarının yaşayış yerinə orada yaşayanların iradəsi ziddinə daxil olmasına
yalnız hakimin qərarı olduqda və digər şəxslərin hüquq və azadlıqlarının
qorunması, ictimai qaydanın və ictimai təhlükəsizliyin təmin olunması və yaxud
ağır cinayətlərin, bədbəxt hadisələrin, təbii fəlakətlərin, qəzaların,
epidemiyaların və epizootiyaların qarşısının alınması və onların nəticələrinin
aradan qaldırılması məqsədi ilə təxirəsalınmaz tədbirlər həyata keçirildikdə
icazə verilir.
Hakimin
qərarı olmadan isə, şəxsiyyət və ya dövlət hakimiyyəti əleyhinə cinayətin
törədilməsinə və ya həmin cinayətin törədilməsinə hazırlığın aparılmasına
dəlalət edən əşya və ya sənədlərin yaşayış yerində gizlədilməsi, şəxsiyyət və
ya dövlət hakimiyyəti əleyhinə cinayəti hazırlayan, törədən, törətmiş,
azadlıqdan məhrum etmə və ya həbs yerlərindən, yaxud mühafizə altından qaçmış
şəxsin yaşayış yerində gizlənməsi, yaşayış yerində insan meyitinin (meyit
hissələrinin) olması, yaşayış yerində insanın həyat və ya səhhəti üçün real
təhlükənin olması, cinayət törətmiş şəxsin bilavasitə "isti izlərlə” təqib edilməsi
hallarında polis əməkdaşı yaşayış yerinə orada yaşayanların iradəsi ziddinə
daxil ola bilər.
Əzizə
Zeynal
