Rusiyanın SWİFT sisteminə girişi qadağan edilərsə, Azərbaycana hansı təsirləri olacaq? – AÇIQLAMA

 

Bununla bağlı Sfera.az-a açıqlama verən iqtisadçı-ekspert Eldəniz Əmirov deyib ki, SWİFT sistemi üzərindən icra edilən hər 10 əməliyyatdan 9-u  ABŞ bankları vasitəsilə həyata keçirilir

"Eyni zamanda, SWIFT şirkətinin əsas səhmdarları ABŞ banklarının nümayəndələrindən ibarətdir. ABŞ vətəndaşları isə öz hökümətləri tərəfindən tətbiq edilən sanksiyalara qanunla tabe olmalıdırlar. Rusiyanın SWIFT sistemindən çıxarılmasının nəticələrinə gəlincə isə, onu demək olar ki, hazırda bankları dünyadan təcrid etməyin ən sadə yolu onları ödəniş sistemindən təcrid etməkdir. Amerika İranı bu ödəniş sistemindən təcrid etməklə şirkətlərlə yanaşı, bankları da iflic vəziyyətinə salıb onun iqtisadiyyatını boğdu.  İran SWIFT-dən çıxarılan zaman Rusiya ABŞ-ın təhdidlərinə tabe olmayan ödəniş sistemi yaratmağa çalışsa da, buna nail ola bilməyib. İndi isə bıçaq sümüyə dirənib.  Düzdür, SWIFT dünyada yeganə ödəniş sistemi deyil. Amma əməliyyatların 90-92%-i bu sistem üzərində aparıldığı üçün bu sistemdən çıxarılmaq Rusiya üçün indiyə qədər qarşılaşmadığı ciddi iqtisadi zərbə olacaq”.

"Amma Rusiyanın hər zaman aqressiv siyasət yürütdüyü heç kimə sirr deyil. Odur ki, bu sanksiya reallığa çevrilsə, Rusiya tərəfindən sərt reaksiya gözləniləndir. Bundan təbii ki, ABŞ heç nə itirməyəcək. Amma bu sanksiyanın ilk vaxtlarında Ukrayna və bəzi Avropa ölkələri üçün müəyyən zərərlərlə müşahidə ediləcək. Ən başda Avropa ciddi qaz sınağı ilə üz-üzə qalacaq. Karbohidrogen ehtiyatlarının qiymətində kəskin artımlar olacaq. Sanksiya tətbiq edilərsə, Rusiyanın bu davranışları ilə Amerikanın sanksiyanı aradan qaldıracağı gözlənilən deyil. Sanksiya qısa müddətli dövr üçün Avropada, uzun müddətli dövr üçün Rusiyada ciddi problemlər yarada bilər”.

"Amma məsələyə qlobal yanaşsaq, bunun Azərbaycana verə biləcəyi faydalar zərərindən dəfələrlə çox olacaq”.