Putin-Paşinyan görüşündən dərhal sonra Ərdoğanın Bakı səfəri – Masada hansı məsələlər olacaq?
Gündəm
11:34 / 14.10.2021
1692
Türkiyə
Prezidenti Rəcəb Tayyib Ərdoğan oktyabrın 26-da Azərbaycana birgünlük səfər edəcək.
Səfərin
Rusiya və Ermənistan prezidentlərinin görüşündən sonra planlaşdırılması Azərbaycanla
Ermənistan arasındakı müəyyən mübahisəli məsələlərin masada olacağı ehtimalını
yaradır.
Maraqlıdır,
Ərdoğanın Azərbaycan səfəri özündə nəyi ehtiva edəcək?
Mövzunu
Sfera.az-a şərh edən politoloq Əlimusa İbrahimov regionda baş verən son proseslərlə
bağlı əməkdaşlığın gücləndiriləcəyini bildirib:
"Türkiyə
prezidenti Rəcəb Tayyib Ərdoğanın oktyabrın 26-da birgünlük Bakıya və Şuşaya səfəri
diqqət mərkəzindədir. Bu barədə rəsmi məlumatlar az olsa da, səfərin iki ölkə
arasında münasibətlərin daha da inkişaf etdirilməsi və regionda baş verən son
hadisələrin iki ölkə prezidenti arasında müzakirə edilərək, düzgün nəticənin
çıxarılması baxımından əhəmiyyətli olacağı gözlənilir. Xüsusən, Ermənistan Baş naziri
Nikol Paşinyanın Rusiyaya səfəri zamanı müzakirə olunan məsələlər diqqət mərkəzində
olacaq. Heç şübhəsiz, xüsusi kanallar vasitəsi ilə Putin-Paşinyan arasında gedən
söhbətlər və əldə olunan razılaşmalar haqda hər iki prezidentdə yetərincə məlumat
var. Azərbaycan və Türkiyə bu sahədə atılacaq addımların sinxronluğunu təmin
etmək üçün səylərini gücləndirəcəklər”.
Politoloq
ikitərəfli müzakirələrdə Zəngəzur dəhlizi və İran məsələsinin olacağını da
vurğulayıb:
"Zəngəzur
dəhlizinin açılması məsələsi də gündəlikdə olacaq. Azərbaycanla Türkiyə bu sahədə
qarşıya çıxmış problemlərin birgə həlli üçün addımlar müəyyənləşdirəcək. İranın
son dövrlərdə Azərbaycana qarşı tutduğu qərəzli mövqeyin də iki ölkə başçısı
arasındakı danışıqların mövzusu olacağı gözlənilir. Hər iki prezidentin İranı
daha konstruktiv mövqe tutmağa çağıran bəyanatlarının şahidi ola bilərik”.
