Rusiya sülhməramlılarının Qarabağdan çıxarılması realdır? – Deputatdan açıqlama
Gündəm
15:27 / 27.08.2021
1855
Qarabağdakı rus sülhməramlılarının fəaliyyətindən
narazılıq artmaqdadır. Son baş verən hadisələr isə, xüsusilə Rusiyanın Ermənistanı
silahlandırması onların sülhməramlı qüvvə statusunda iştirakını birmənalı şəkildə
şübhə altına qoyub. Bu isə Azərbaycanda "Rusiya sülhməramlıları ərazilərimizdən
çıxsın” tələbinin tərəfdarlarını durmadan artırır.
Maraqlıdır, hadisələrin belə bir inkişaf
perspektivi nə dərəcədə realdır?
Milli Məclisin deputatı Naqif Həmzəyev
Sfera.az-a açıqlamasında deyib ki, istənilən vaxt tərəflərdən birinin – xüsusilə
də Azərbaycan tərəfinin istəyi ilə Rusiya sülhməramlıları Qarabağ ərazisindən
çıxarıla bilər:
"Hazırda müəyyən narazılıqlar, nöqsanlar nəzərə
çarpsa da, unutmamalıyıq ki, bütün proses Azərbaycan ordusunun və dövlətinin
tam nəzarətindədir. Rusiyanın Ermənistanı yenidən silahlandırması faktdır, amma
Azərbaycan öz gücünü qoruyub saxlayır, hərbi potensialını artırır və regionda
söz sahibi, diktə edən tərəf ölkəmizdir. Ərazilərimizdə sülhməramlıların fəaliyyətini
müəyyən dərəcədə hansısa müddətə qədər biz də istəyirik. Ancaq faktiki olaraq, biz
işğaldan azad edilmiş ərazilərdə möhkəmləndikdən, öz sərhədlərimizi tam müəyyənləşdirdikdən
sonra artıq istənilən vaxt rus sülhməramlılarının ərazidən çıxarılması tələbi
ilə çıxış edə bilərik”.
Millət vəkili bildirib ki, prosesləri səbrlə
izləməliyik:
"Bəzi nüanslar var ki, onları açıq-aşkar səsləndirmək
olmur. Faktiki olaraq, ərazilərimizdə yaşayan erməni əsilli, yolunu azmış həmin
insanlar onsuz da anlayırlar ki, onlara sülhməramlılardan heç bir fayda və
xeyir ola bilməz. Onların tək yardım, ümid yolu Azərbaycan dövlətidir. Mediada
izlədiyimiz xəbərlərdən də görünür ki, onlar işsiz qalıblar, su, işıq problemləri
var. Onlar Qarabağda sürətli qayıdış infrastruktur layihələrinin icrasını izləyir
və orada işləyib evlərinə bir parça çörək aparmaq istəyirlər. Yəni, proses
getdikcə daha da aktual olacaq və ermənilər ötən müddət ərzində nə qədər səhvə
yol verdiklərini, separatçılara aldandıqlarını yaxşı anlayacaqlar”.
