Göyçay rayonunda karantin rejimini ciddi şəkildə pozan 2 nəfər rayon sakini həbs olunub.

"Report"un Yuxarı Şirvan bürosu xəbər verir ki, koronavirus (COVID-19) epidemiyasının yayılma təhlükəsi ilə əlaqədar Azərbaycanda tətbiq olunan gücləndirilmiş karantin rejiminə regionlarda yaşayan bəzi vətəndaşlar tərəfindən əməl olunmur və onlar polislər tərəfindən qanuna müvafiq qaydada cərimələnirlər.

Təkcə bu gün ərzində Göyçay rayon Polis Şöbəsinin əməkdaşları İnzibati Xətalar Məcəlləsinin 211-ci maddəsini kobud şəkildə pozan 17 nəfər rayon sakini barəsində cərimə tətbiq ediblər. Onlardan 2 nəfər rayon sakini məhkəmənin qərarı ilə inzibati qaydada həbs olunub.

Rayon polis şöbəsinin əməkdaşları reydlər zamanı insanlara səslənərək evdən çıxmamağa karantin rejiminin qaydalarına ciddi şəkildə əməl etməyə çağırır.

Hazırda Göyçay rayon Polis Şöbəsinin əməkdaşları gücləndirilmiş iş rejimində xidmətlərini davam etdirir.

Xatırladaq ki, sfera.az saytı olaraq ötən gün Göyçay rayonunda karantin rejiminə riayyət edilmədiyi və müxtəlif şəxslərin hansısa yollarla saxta icazə kağızları əldə etdikləri barədə məqalə dərc etmişdik. Artıq bu gün Göyçayda karantin rejimini pozduğuna görə 2 nəfərin həbs edilməsi isə bu istiqamətdə arzulanan tədbirlərin həyata keçirildiyindən xəbər verir.