Gənc deputat seçicilərinin su problemlərindən yazdı
Millət vəkili Bəhruz Məhərrəmov təmsil etdiyi Biləsuvar rayonunun su problemi haqda yazıb.
Sfera.az-ın məlumatına görə, deputat əkin mövsümünün başlanması ilə əlaqədar əhalinin qarşılaşdığı problemi özünün sosial şəbəkə hesabından diqqətə çatdırıb.
"Biləsuvar sakinlərinin dolanışığı torpaqdan çıxır, əhalinin böyük əksəriyyətini pambıqçılıqla məşğuldur. Amma insanların əkin sahələrini suvarmağa suyu yoxdur. Düzdür, çətin bir dövrdən keçirik, ölkə koronovirusla mübarizəyə səfərbər olunub. Lakin, mövsüm də gözləmir, yəni heç bir tədbir əkin sezonunu əngəlləyə bilməz”.
Su təminatının yaxşılaşdırılması istiqamətində tədbirlərin görülməsi vacibliyinə toxunan millət vəkili bunları qeyd edib: "Hesab edirəm ki, vaxtında tədbirlər görülməsə rayon iqtisadiyyatı da, əhalinin güzaranı ciddi zərbə altında qalacaq. Onsuz da koronovirusla mübarizə tədbirləri Biləsuvarda əhalinin dolanışığına təsir edib.Təbii ki, biz bu tədbirləri alqışlayırıq, həyati əhəmiyyətli hesab edirik. Lakin bütün bunların fonunda ikinci bir zərbənin də susuz qalmış əkin sahələrindən gəlməsi əhalini çıxılmaz vəziyyətə salar. Ona görə də aidiyyatı qurumlardan - Azərbaycan Hökumətindən, xüsusən Meliorasiya və Su Təsərrüfatı ASC-dən bu məsələyə xüsusi diqqət ayırmalarını xahiş edirəm və bununla bağlı müraciətimi onlara da ünvanlayıram”.