Bununla bağlı sosial mediada fikirlərini bölüşənlərin əksəriyyəti mövcud vəziyyəti təəssüf hissi ilə qarşılayıb. Çünki oyunlarda Azərbaycanı təmsil edənlərin hamısı olmasa da, bir qismi ilə bağı ümidlər var idi.

Cüdo üzrə milli komandamızın sabiq məşqçisi Fərhad Məmmədov cüdoçularımızın Olimpiya Oyunlarında iştirakı ilə bağlı fikirlərini Sfera.az-la bölüşüb. Həmin qısa müsahibəni təqdim edirik:

- Təbii ki, Olimpiya Oyunları ilə bağlı səsləndirilən fikirlərlə də tanışam. Təəssüf ki, idmançılarımız hələ ki mübarizəni medalsız başa vurublar. Düşünürəm ki, hazırkı nəticələrin səbəblərindən biri olimpiya oyunlarının ab-havasıdır. Eyni zamanda püşkatma da milli komanda üçün heç də uğurlu olmadı.

- Məsələn, 60 kq çəki dərəcəsində mübarizə aparan cüdoçu Kəramət Hüseynov 1/8 final mərhələsində gürcüstanlı Lukum Tsxvimiani ilə üz-üzə gəlib və rəqibinə ipponla məğlub olan idmançı mübarizəni dayandırmalı olub. Yaxud Azərbaycanın əsas medal ümidlərindən hesab olunan Rüstəm Orucov (73 kq) Tokio-2020-də 3-cü yer uğrunda görüşdə cənubi koreyalı dünya çempionu An Çanqrimlə, Murad Fətiyev (81 kq)  1/8 finalında Monqolustan idmançısı Səid Mollaye ilə görüşdə məğlub oldular. Həmçinin digər çəkilərdə də ikinci görüşə çətin rəqiblər düşüb. Düzdür, bu Olimpiya Oyunlarıdır və burada zəif rəqib olmur. Hər bir halda, qeyd etdiyim göstəricilər də oyunların bu cür nəticələnməsinə səbəbdir.

- Əlbəttə, pandemiya da idmançılarımıza təsirsiz ötüşməyib. Az da olsa bu ehtimal da mümkündür. Yəni karantin dövründə idman zallarının bağlı olması, ümumi psixoloji əhval-ruhiyyə və s. Digər tərəfdən bildiyim qədərilə, Cüdo Federasiyası ilboyu komandanı təlimlərlə, yarışlarla təmin etmişdi. Ümid edirəm ki, Azərbaycan oyunlardan medalsız ayrılmayacaq.

- Cüdoçularımızdan Zelim Kotsoyev (100 kq), İrina Kindzerskaya  (+78 kq), Məmmədəli Mehdiyevin (90 kq) qazanacağına inamım var. Əsas fiziki hazırlıq olsa da, psixoloji cəhətdən özünü yaxşı hazırlayanların üstünlüyü daha çoxdur.

Xatırladaq ki, Tokio olimpiadasında Azərbaycanı ümumilikdə 44 idmançı təmsil edir. Lisenziyaların 9-u cüdo, 7-si güləş, 5-i bədii gimnastikanın qrup hərəkətləri üzrə komanda, 1-i fərdi çövnövçülük, 5-i boks, 3-ü karate, 2-si atletika, 2-si üzgüçülük, 2-si taekvondo, 2-si idman gimnastikası, 1-i güllə atıcılığı, 1-i şosse velosipedi, 1-i qılıncoynatma, 1-i badminton, 1-i triatlon, 1-i stend atıcılığı (vayld-kart) növlərində qazanılıb. Olimpiadaya avqustun 8-də yekun vurulacaq.