Ermənistanda seçkiqabağı kampaniya bu gündən
etibarən sona çatır. Artıq "sükut günü” elan olunacaq.
Maraqlıdır, seçki hazırlıqları ilə bağlı son vəziyyət
nə yerdədir?
Politoloq Əlimusa İbrahimov Sfera.az-a
açıqlamasında bildirib ki, Ermənistanda seçkiqabağı kampaniyanın aparılması
zamanı ciddi qanun pozuntusunun olması haqqında namizədlərdən iradlar daxil
olmayıb:
"Paşinyanın əsas rəqibi olan Robert Köçəryan
öz imkanlarından maksimum istifadə edərək seçkiqabağı kampaniyasını təşkil
edib. Seçicilərlə görüşü zamanı iqtidarda olan Paşinyan hökumətini Ermənistanı
acınacaqlı vəziyyətə salmaqda günahlandıraraq hakimiyyətə gələcəyi təqdirdə,
qısa müddətdə iqtisadiyyatda dönüşə nail olacağı haqda vədlər verib. Amma Köçəryanın
verdiyi vədlərə artıq inanan yoxdur və onun insanlar arasında nüfuzunun yüksək
olması haqda şişirdilmiş məlumatların verilməsinə baxmayaraq, Qarabağ erməni
klanının yenidən hakimiyyətə gəlməsi qorxusu onu hakimiyyətə aparan yolda ən
böyük maneədir. Ermənilər yenidən "Qarabağ bataqlığına” girmək istəmir və doğru
olaraq bu bataglığdan ikinci çıxışları olmayacağını düşünürlər”.
Müsahibimiz seçki günü ciddi problemin yaşanmayacağını
qeyd edib: "Hakimiyyət Avropa və Amerika qarşısında özünün
demokrat imicini qorumaq üçün seçkilərə müdaxilə etməyəcək. Digər tərəfdən
Paşinyan yeni qüvvə ilə hakimiyyətdə təmsil olacağına tam əmindir. Çünki əhalinin
Qarabağ erməni klanına olan qəzəb və nifrətindən xəbərdardır. 100-150 minlik
Qarabağdan olan insanların 2 milyon Paşinyan tərəfdarları qarşısında davam gətirmələrini
düşünənlər yalnız fantastik əsərlərin müəllifləri hesab oluna bilərlər.
Deməli, növbədənkənar parlament seçkisində Nikol
Paşinyanın böyük qüvvə ilə hakimiyyətdə yenidən təmsil olunması yolunda ciddi
maneə yoxdur. Amma Robert Köçaryan və onun tərəfdarlarının uğradıqları məğlubiyyəti
necə qarşılayacaqları haqqında heç kim proqnoz verə bilmir. Onlar seçkinin
saxtalaşdırıldığını iddia edə, insanları mitinqə çağıra, hətta vətəndaş
qarşıdurmasına qalxa bilərlər. Digər tərəfdən, Paşinyanın yenidən hakimiyyətə
qayıdışına Rusiyanın olacaq reaksiyası da məlum deyil. Hər halda seçkinin baş
tutmasını gözləməkdən başqa yol yoxdur”.
Günay Rəsulqızı
