Bununla bağlı Sfera.az-a açıqlama verən Milli Məclisin deputatı Elman Məmmədov qeyd edib ki, Ermənistan dövləti o vəsaiti ünvanlı ayırıb – fiziki şəxslərə yox, hər hansı bir quruma:

"Bu qurumun da adı onların qəbul etdiyi kimi "Artsax”dır. Həmin cinayətkar qurum 1991-ci ilin sentyabrından Azərbaycan dövlətinin ərazisində yaradılıb. Ermənistan 30 il ərzində qurumu qoruyur, hər cəhətdən təmin edir. Artıq Azərbaycan öz ərazi bütövlüyünü bərpa edib. Ermənilərin yaratdığı qurum ərazilərimizdə bu gün qeyri-qanuni separatçı, cinayətkar, terrorçu qurum kimi hələlik rus sülhməramlılarının hesabına mövcudluğunu saxlayır. Əgər Ermənistan dövləti Azərbaycanla sülh sazişindən, əməkdaşlıqdan, qonşuluqdan, kommunikasiya xətlərinin açılmasından, əlaqələrin yaranmasından danışırsa, bu pul ayırmaları ilə yenidən ərazi bütövlüyümüzə qarşı hörmətsizlik edir, qanunlarımızı pozur. Bir tərəfdən Azərbaycana sülh sazişinə razılaşmaya getdiklərini bəyan edirlər, digər tərəfdən Azərbaycan ərazisindəki cinayətkar separatçı quruma hərbi cəhətdən köməklik edir, bütün təminatları göndərir, indi də büdcəsindən pul ayırır”.

"Belə olan halda, hansı sülhdən, razılaşmadan danışmaq olar? Nə qədər ki, separatçı qurum bizim daxilimizdə var, dövlətçiliyimizə qarşı təhlükə mənbəyi olaraq da qalacaq. Maraqlısı budur ki, pullar necə gətiriləcək? Təbii ki, rus sülhməramlılarının köməkliyi ilə. Rusların xətrinə dəyməsin, amma belə çıxır ki, "dostuq” deyə-deyə ərazimizdə yerləşən sülhməramlı kontingenti də separatçıları müdafiə edir, Ermənistanla birlikdə onların yaşaması, fəaliyyəti üçün şərait yaradır. Burada gizlədiləsi bir şey yoxdur, mən də yeni bir şey demirəm. Rus sülhməramlıları elə Ermənistan qədər separatçıların ərazimizdə qalmasına çalışırlar. 

Azərbaycan isə mütləq  öz ərazisini separatçılardan, cinayətkar qurumdan və ona aid nə varsa onlardan təmizləmək məcburiyyətində qalmalıdır və bu addımı atmalıdır. Bunun adı müharibə deyil, müharibə bitib. Bunun adı ərazimizdə olan qeyri-qanuni separatçı qurumu və silahlı qruplaşmaları məhv etmək, ərazimizi cinayətkarlardan təmizləmək üçün keçiriləcək antiterror əməliyyatıdır. Elə şimal qonşumuz Rusiyanı götürək. Bu ölkə Şimali Qafqazda, öz ərazisində uzun illərdir separatçı quruma qarşı antiterror əməliyyatı keçirdiklərini deyir. Bizə niyə rəva görmürlər? "Onlarla işiniz olmasın” deyirlər? Biz qəbulolunmaz faktın qarşısını almaq üçün mütləq ərazilərimizi separatçılardan və cinayətkarlardan təmizləməliyik. Ermənistan onları yığıb ya elə Ermənistana aparsın, ya da Rusiyaya – orda respublika da yaratsınlar, pul da versinlər, nə istəyirlər etsinlər, təki bizim ərazimizdən təmizlənsinlər Bu, bizim hüququmuzdur və bunu edəcəyik”.