Elnur Allahverdiyev növbəti dəfə seçiciləri ilə görüşdü - FOTO
12:45 / 21.10.2021
655
"Dünən seçicilərimizlə növbəti görüşümüz baş tutdu. Oktyabr ayında bu, ilk görüşümüz idi. Vətən müharibəsinin ildönümündə keçirilən tədbirlər, çoxsaylı görüşlərimizlə əlaqədar bu ay seçici qəbulunu yalnız bir dəfə reallaşdıra bilmişik. Güman edirəm ki, noyabrdan etibarən arzulayan sakinlərimizlə daha tez-tez bir araya gələcəyik".
Sfera.az xəbər verir ki, bunu deputat Elnur Allahverdiyev bildirib.
O, bu dəfəki qəbulunda müxtəlif məsələlərin müzakirə edildiyini diqqətə çatdırıb:
"Dairəmizin ərazisindəki binalardan birində istilik sistemi ilə bağlı çətinlik yaranıb. Bununla bağlı yerli icra orqanları ilə fikir mübadiləsi aparacağıq. Hər zaman olduğu kimi, bu dəfə də daşınmaz əmlak və mülkiyyətlə bağlı müraciətlər var. Seçicilərimizdən ikisi (onlardan biri Vətən müharibəsi qazisidir) belə demək mümkündürsə, özəl işə malikdirlər, fəaliyyətlərini genişləndirmək istəyirlər. Bu ətrafda fikir mübadiləmiz oldu.
Xüsusi qeyd etməliyəm ki, dairəmizin iki qazisi ilə yaxından tanış olmaq imkanı qazandım - Məmmədzadə Orxan və Cəbiyev Rafiq. Döyüş yollarından danışdılar. Cəngavərdirlər! Xalqımızın belə övladları ilə həmişə fəxr etməliyik. Qazilərimizlə mütəmadi şəkildə görüşürük, yollarımız kəsişir, xüsusilə hazırda hər gün Fəxri Xiyabanda iştirak etdiyimiz şəhidlərimizin anım mərasimlərində. Ancaq onlarla yaxından ünsiyyətin ayrı önəmi var. Allah hamısına cansağlığı versin, yaralılar tezliklə tam şəfa tapsınlar!"