Misir prezidenti əhalini arıqlamağa çağırıb

 

Dövlət başçısı Əbdülfəttah Sisinin bu açıqlaması əhalidə kök adamların tutulub həbsə atılacağıyla bağlı zarafatlara yol açıb. Misirdə ölkə boyu boy və çəki ölçmə kampaniyası nəticəsində əhalinin 75%-nin kök olduğu məlum olub. Bu məlumatlardan sonra Sisi qatıldığı bir televiziya verilişində bunları deyib:

 

"Hara gedirəm kök adamları görürəm. Bu insanlar kimdilər, niyə özlərinə baxmırlar deyə düşünürəm. Bu vəziyyətdə necə hərəkət edə bilirlər axı?”.

 

Prezident bunları dedikdən sonra insanlara nümunə olmağa qərar verib. Səhər tezdən velosipedlə paytaxt Qahirənin küçələrində gəzintilərə başlayıb. Hərbi məktəbə baş çəkən Sisi deyib ki, müəyyən bədən kriteriyalarına cavab verməyən tələbələr məzun ola bilməyəcəklər. Bundan sonra prezident Təhsil Nazirliyinə göstəriş verib ki, bədən tərbiyəsi bütün dərs kitablarına salınsın. Televiziya kanallarında artıq çəkili aparıcıların efirə buraxılmaması barədə göstəriş verilib. Təhsil naziri də şagirdlərə və tələbələrə metroda iki stansiya əvvəl düşüb piyada getmələrini tövsiyə edib.

 

Misirin 98 milyon əhalisinin 30%-i yoxsulluq həddinin altıda yaşayır. Buna baxmayaraq hər 3 nəfərdən biri kökdür. Vaşinqton universitetinin araşdırmasına görə bu dünyada ən yüksək nəticə sayılır.