Suriya Demokratik Qüvvələri (SDQ) ilə Ankara arasında gərginlik son günlərdə təhlükəli həddə çatıb. Suriyanın yeni hakimiyyətinin 8 dekabrda birilliyini qeyd etdiyi bir vaxtda Türkiyə–SDQ xəttində qarşıdurma açıq hərbi siqnallar mərhələsinə keçib.

Sfera.az xəbər verir ki, Türkiyə SDQ-nin 10 martda Dəməşqlə imzaladığı “Terrorsuz Türkiyə” prosesinə dair razılaşmanı icra etməsini tələb kimi irəli sürür.

Sənəd PKK və onun bütün qollarının tərksilah olunmasını nəzərdə tutur. Ankara əvvəlcədən bildirmişdi ki, SDQ-nin Suriya ordusuna inteqrasiya prosesi 2025-ci ilin sonunadək tamamlanmalıdır, əks halda hərbi əməliyyatlar bərpa ediləcək.

Son iki gün ərzində Türkiyənin verdiyi siqnallar göstərir ki, əməliyyat istənilən an başlaya bilər. Türk mediasının məlumatına görə, ordu Suriya ərazisinə üç istiqamətdən daxil olub, Dəməşq qüvvələri isə SDQ ilə təmas xəttinin əsas nöqtəsi sayılan Deyr əz-Zora cəmləşib.

Hazırda rəsmi Dəməşq Ankaraa ilə dost olsa da, Türkiyənin bölgədə güclənməsinə qarşı çıxan əsas qüvvələrdən biri İsraildir. İsrail son aylarda SDQ ilə birbaşa təmas qurub. Hər iki ölkənin ABŞ-ın müttəfiqi olması isə prosesin mürəkkəbliyini daha da artırır.

Eyni vaxtda SDQ-nin nümayəndəsi İlham Əhməd İstanbulda DEM partiyasının konfransına videobağlantı ilə çıxış edib. O bildirib ki, “Terrorsuz Türkiyə” prosesi SDQ-yə aid deyil. Ona görə də, Ankara Dəməşq üzərindən yox, birbaşa SDQ ilə danışıqlar aparmalıdır.

SDQ lideri Mazlum Abdi isə “Jerusalem Post” qəzetinə müsahibəsində təşkilatın Şaara hökuməti ilə əməkdaşlığa hazır olduğunu deyib. Həmin məqalədə Abdi İsrailin dəstəyi ilə əməkdaşlığa açıq olduğunu vurğulayıb və ABŞ qoşunlarının Suriyada qalmasının vacibliyini qeyd edib.

Türkiyə siyasi dairələrində hesab edirlər ki, “Terrorsuz Türkiyə” prosesi də uğursuz olarsa, yeni bir siyasi cəhd baş verməyəcək. O zaman Ankara PKK və SDQ ilə yalnız hərbi dildə danışacaq. Yəni Suriya Demokratik Qüvvələri tərksilah edilməsə, əməliyyat qaçılmaz olacaq./globalinfo

Ərdoğannın başqa seçimi qalmadı: Yeganə çıxış yolu müharibədir…