Şimal Koreya bu qitələrarası raketini ilk dəfə nümayiş etdirdi - FOTO
Şimal Koreya hakim Koreya Əmək Partiyasının 80 illiyini paytaxt Pxenyanda keçirilən möhtəşəm hərbi paradla qeyd edib. Parad zamanı ölkənin yeni nəsil “Hwasong-20” qitələrarası ballistik raketi ilk dəfə ictimaiyyətə təqdim olunub.
Sfera.az xarici mediaya istinadən xəbər verir ki, paradı izləyənlər arasında Şimal Koreya lideri Kim Çen In, Çin Baş naziri Li Çian, Rusiya Təhlükəsizlik Şurası sədrinin müavini Dmitri Medvedev və Vyetnam Kommunist Partiyasının Baş katibi To Lam da olub.
Kim Çen In çıxışında paradı ölkənin hərbi qüdrətinin göstəricisi adlandırıb:
“Yalnız güc və qələbə ilə təmin oluna biləcək suverenliyimizin və amalımızın əbədiliyini bu gün bir daha təsdiqləyirik”, – deyə o bildirib.
Lider Koreya Əmək Partiyasının uğurlarını ordunun gücü ilə əlaqələndirib və ordunun partiyanın mübarizəsini dəstəkləməkdə bundan sonra da əsas rol oynayacağını vurğulayıb:
“Ordumuz düşmənlərini çəkindirməyə qadir, intizamlı və əxlaqlı bir qüvvə kimi durmadan güclənməlidir”.
Paradda “Chonma-20” əsas döyüş tankları, 155 millimetrlik haubitsalar və 600 millimetrlik çoxnüvəli raket sistemləri kimi müasir silahlarla yanaşı, ötən ay mühərrik sınaqları tamamlanan “Hwasong-20” qitələrarası ballistik raketi də nümayiş etdirilib.
Mütəxəssislərin fikrincə, yeni raket ABŞ qitəsini vura biləcək məsafəyə malikdir və parad beynəlxalq ictimaiyyətə “nüvə caydırıcılığının gücləndirildiyi” mesajını verməyi hədəfləyib.
Xatırladaq ki, Şimal Koreya bir gün öncə Koreya Əmək Partiyasının 80 illiyi münasibətilə Pxenyandakı May Day stadionunda da genişmiqyaslı tədbir keçirmişdi. Kim Çen In həmin çıxışında bildirib:
“Şimal Koreyanı daha zəngin, daha gözəl və dünyanın ən yaxşı sosialist cənnətinə çevirəcəyəm”.
Bəsti Rəfizadə
Sfera.az
