Evinin altında İkinci Dünya Müharibəsindən qalma bunker tapdı - FOTOLAR
Norveçin Trondheim şəhərinin sakini gözlənilməz kəşfdən sonra yaşadığı şoku bölüşüb. Onun evinin altında İkinci Dünya Müharibəsindən qalma nəhəng bunker aşkar edilib.
Sfera.az bildirir ki, ev sahibinin sözlərinə görə, bunker 1980-ci illərdə torpaqla örtülüb və möhürlənib.
Kişi kitabxanasındakı kitab rəfinin arxasında qeyri-adi mexanizm gördüyü zaman təsadüfən gizli məkana rast gəlib. Arxasında onun evindən iki dəfə böyük olan yeraltı kameraya aparan bir qapı var olub. Maraq ona qalib gəlib və bir qədər qazıntıdan sonra içəri girə bilib.
"Mən İkinci Dünya Müharibəsi bunkerinin damında oturan evdə yaşayıram. Bu yeri alanda bu kəşf edilməmiş tikilinin varlığından xəbərim var idi, lakin bu yaxınlarda araşdırmaq qərarına gəldim. Yerin altında pəncərələr tapdım və içəridən keçid qaza bildim" - deyə o izah edib.
Yerli hərbi muzeydən verilən məlumata görə, bu ərazi vaxtilə 1940-cı ilin iyununda alman qoşunları tərəfindən yaradılmış Sunndal Batareyasının bir hissəsi olub. Onun Nardo yaylasında əlverişli yerləşməsi bütün istiqamətlərdə idarəedici mənzərəni təmin edirdi.
1944-cü ilə qədər burada 32-ci dəniz piyada alayı yerləşdirilib və iri çaplı silahlarla yeni batareyanın tikintisi gedib. Ümumilikdə ərazidə 20-dən çox bina olub.
Aşkar edilmiş bunker təxminən 136 kvadratmetr ərazini əhatə edir. Ən böyük iki otağın ölçüləri 3 ilə 10 metr, dəhliz 21 ilə 1 metr, tavanların hündürlüyü 2,7 metrə çatır.
Kişi artıq binaları təmizləməyə başladığını bildirib. Tapıntılar arasında unitaz, köhnə oturacaq və hətta velosiped də var.
İndi ev sahibi obyekti daha ətraflı araşdırmaq üçün hərbi muzey nümayəndələrinin gəlişini gözləyir.
Aysel
