Zelenski Modi ilə danışdı - Bu məsələdə RAZILIĞA GƏLDİ

Ukrayna prezidenti Volodimir Zelenski Hindistan baş Naziri Narendra Modi ilə telefon danışığı aparıb.

Sfera.az xəbər verir ki, bu barədə Ukrayna mətbuatı məlumat yayıb.

Zelenski bildirib ki, söhbət zamanı o, Modini Vaşinqtonda ABŞ prezidenti Donald Trampla keçirilən danışıqların nəticələri barədə məlumatlandırıb.

Danışıqlarda Avropa liderlərinin də iştirak etdiyi vurğulanır.

"Bu, məhsuldar və vacib söhbət idi. Tərəfdaşlarımızla real sülhə necə nail olmaq barədə ümumi baxışı bölüşdük. Ukrayna Rusiya lideri ilə görüşə hazır olduğunu təsdiqləyib", - Zelenski yazıb.

Prezident həmçinin qeyd edib ki, o və Modi Şanxay Əməkdaşlıq Təşkilatı (ŞƏT) sammitindən əvvəl mövqelərini əlaqələndiriblər. Onun sözlərinə görə, Hindistan sammit çərçivəsində keçiriləcək görüşlərdə Rusiyaya və digər liderlərə Kiyevdən münaqişənin həlli ilə bağlı “qarşılıqlı siqnal” çatdırılması barədə razılığa gəliblər. Sammit avqustun 31-dən sentyabrın 1-dək Çində keçiriləcək.

Hindistan Baş Nazirinin mətbuat xidməti bildirib ki, Modi telefon danışığı zamanı Zelenski ilə Ukraynadakı münaqişə ilə bağlı cari hadisələri müzakirə edib.