Çin Rusiya ilə sərhəddə quru liman inşa edir

Çinin şimal-şərqində, Heilongjiang əyalətinin Suifenhe sərhəd şəhərində Çin-Rusiya logistika kompleksi tikilir.

Sfera.az “Sinxua” agentliyinə istinadən xəbər verir ki, layihənin məqsədi Rusiya Federasiyası və digər ölkələrlə ticarət əlaqələrini gücləndirməkdir.

Məlumata əsasən, işlər sürətlə davam edir. 23,7 min kvadratmetr ərazini əhatə edən obyektə 120 milyon yuan (təxminən 17 milyon ABŞ dolları) sərmayə yatırılıb.

Kompleksdə məhsulların nümayişi və saxlanması, onların axınlarının yenidən bölüşdürülməsi üçün sahələr, eləcə də ofis binaları və otel sektoru nəzərdə tutulub.

Layihənin reallaşdırılması    hər iki ölkənin logistik imkanlarını genişləndirəcək, vergi daxilolmalarını artıracaq və çoxsaylı iş yerləri yaradacaq.
Bundan əlavə, müasir infrastruktur və smart texnologiyaların tətbiqi elektron ticarətin inkişafına təkan verəcək. Bu isə Çin şirkətlərinə Rusiya və Şərqi Avropa bazarlarına daha səmərəli çıxış imkanı yaradacaq.

Yeni quru liman, həmçinin Heilongjiang əyalətinin xarici əlaqələrinin genişləndirilməsi və Şimal-Şərqi Asiya ilə əməkdaşlığın möhkəmlənməsində mühüm rol oynayacaq. Suifenhe şəhərinin inkişafına da ciddi təsir göstərəcəyi gözlənilir.

Fidan Hacızadə 
Sfera.az