Putin və Tramp görüşündə nələr danışılacaq? - RƏY

Rusiya və ABŞ prezidentləri Vladimir Putin və Donald Trampın qarşıdakı şəxsi görüşündə İstanbulda nümayəndə heyətləri arasında aparılmış danışıqlarda qaldırılan məsələlər müzakirə olunacaq. 

Sfera.az “News.ru”ya istinadən xəbər verir ki, bu barədə Dövlət Dumasının Beynəlxalq Əlaqələr Komitəsi sədrinin birinci müavini Aleksey Çepa müsahibəsində məlumat verib.

Çepa qarşıdan gələn görüşü “müsbət əlamət” kimi qiymətləndirib:

“Prezidentlər Uitkoff ilə İstanbulda keçirilmiş görüşlərdə müzakirə olunan məsələləri nəzərdən keçirəcəklər. Bu görüş Uitkoffun səfəri zamanı razılaşdırılıb. Dünənki qərarla hazırkı hazırlıqlar arasında çox qısa zaman var. Bu isə onu göstərir ki, proses öncədən planlaşdırılıb”.

Deputat əlavə edib ki, belə səviyyəli tədbirlər adətən uzunmüddətli hazırlıq tələb edir və dərhal baş tutmur. Onun sözlərinə görə, buna görə də baş verənləri müsbət nəticə hesab etmək olar.

Rəsmi məlumata görə, Moskva və Vaşinqton artıq prezidentlərin görüşü ilə bağlı razılığa gəliblər. Görüşün yaxın günlərdə- çox güman ki, gələn həftə baş tutacağı gözlənilir. Məkanın artıq müəyyənləşdirildiyi də qeyd olunur. Rusiya Prezidentinin köməkçisi Yuri Uşakov bildirib ki, Kreml bu təmasların uğurlu və məhsuldar keçəcəyinə ümid edir.

Xatırladaq ki, bundan əvvəl ABŞ Ukrayna münaqişəsinin mümkün həlli ilə bağlı mövqeyini açıqlamışdı. Hazırda gündəmdə isə Putin-Tramp görüşündən gözləntilər və Zelenskinin iştirakı ilə üçtərəfli sammitin reallaşma ehtimalı müzakirə olunur.

Fidan Hacızadə
Sfera.az