Türklərin ən çox köç etdiyi ölkələr - Adlar
Türkiyə vətəndaşlarının ən çox köç etdiyi ölkələrin siyahısı açıqlanıb.
Sfera.az “Sözcü”yə istinadən xəbər verir ki, Türkiyə Xarici İşlər Nazirliyinin məlumatına görə, hazırda dünyanın müxtəlif ölkələrində 7,5 milyondan çox Türkiyə vətəndaşı yaşayır. Bu əhalinin böyük hissəsi, təxminən 6,5 milyonu Qərbi Avropa ölkələrində məskunlaşıb.
1960-cı illərdə başlayan işçi köçü ilə türklər əsasən Avropa ölkələrinə üz tutublar. Zamanla bu insanlar yaşadıqları ölkələrdə sosial həyata inteqrasiya olunaraq iqtisadi və mədəni sahələrdə fəallıq göstərməyə başlayıblar.
Ən çox türk vətəndaşının yaşadığı 10 ölkə belə sıralanır:
1. Almaniya – 4 milyon nəfər;
Türkiyədən köçün ən çox olduğu ölkə Almaniyadır. 1960-cı illərdə “qonaq işçi” proqramları çərçivəsində bu ölkəyə gələn türklər zamanla böyük bir diaspora çevriliblər. Hazırda Almaniyada yaşayan 4 milyon türk, iki ölkə arasında mədəni və iqtisadi körpü rolunu oynayır.
2. Fransa – 700 min nəfər nəfər;
Fransa, Almaniyadan sonra türklərin ən çox yaşadığı ikinci Avropa ölkəsidir. Buradakı türk icması əsasən iri şəhərlərdə cəmləşib.
3. Niderland – 500 min nəfər;
Türklərin əsasən Rotterdam və Amsterdamda məskunlaşdığı Niderlandda kənd təsərrüfatı, sənaye və xidmət sahələrində fəaliyyət göstərən güclü bir türk diasporası var.
4. Birləşmiş Krallıq – 400 min nəfər;
1970-ci illərdə siyasi və iqtisadi səbəblərlə Birləşmiş Krallığa köç edən türklər bu gün restoran, mədəniyyət və ticarət sahələrində fəaldırlar.
5. ABŞ – 300 min nəfər;
Amerikada yaşayan türklər əsasən təhsil, elm və sahibkarlıq sahələrində çalışırlar. Ən çox türk Nyu York, Los Anceles və Çikaqo şəhərlərində cəmləşib.
6. Avstriya – 250 min nəfər;
Avstriyanın paytaxtı Vyana başda olmaqla bir çox bölgəsində türklər uzun illərdir məskunlaşıblar.
7. Belçika – 240 min nəfər;
Türklərin əsasən Limburg və Brüssel ətrafında cəmləşdiyi Belçikada mədən və sənaye sektorlarında çalışan türk ailələri artıq üçüncü nəsli yetişdirir.
8. Avstraliya – 150 min nəfər;
Türkiyəyə coğrafi cəhətdən uzaq olsa da, Avstraliyada da güclü türk icması mövcuddur. Buradakı köç əsasən 20-ci əsrin ortalarında başlayıb.
9. İsveçrə – 130 min nəfər;
1960-cı illərdən başlayaraq sənaye sahəsində işləmək üçün bu ölkəyə köç edən türklər hazırda müxtəlif sahələrdə fəaliyyət göstərirlər.
10. Danimarka – 75 min nəfər;
Nisbətən azsaylı türk əhalisinə sahib olan Danimarkada türklər mədəni fəaliyyətlər və inteqrasiya baxımından fəallıqları ilə seçilirlər.
Qeyd edək ki, türk diasporasının artımı yalnız miqrasiya ilə deyil, həm də ailə birləşmələri və doğumlar yolu ilə davam edir. Bu amillər xaricdəki türk icmalarının güclənməsinə və Türkiyə ilə əlaqələrinin möhkəmlənməsinə töhfə verir.
Bəsti Rəfizadə
Sfera.az
