Avropa sürücülük vəsiqəsinə yaş məhdudiyyəti qoydu - Yenilik

Avropa İttifaqı (Aİ) sürücülük təhlükəsizliyini artırmaq məqsədilə yeni yaş məhdudiyyəti tətbiqinə başlayıb. Yeni qaydalar İspaniyada qüvvəyə minib.

Sfera.az xarici mediaya istinadən xəbər verir ki, yaşlanan sürücülərdə refleks zəifliyinin artması və bunun nəticəsində baş verən yol-nəqliyyat hadisələrinin qarşısını almaq üçün Aİ yaşla bağlı məhdudiyyətlər tətbiq edib.

İlk olaraq “B” kateqoriyalı sürücülük vəsiqəsinə şamil edilən bu qayda gələcəkdə Aİ ölkələri üzrə geniş şəkildə tətbiq olunacaq.

Yeni tənzimləməyə əsasən, Aİ ölkələrində 75 yaşını keçmiş şəxslərin B kateqoriyalı sürücülük vəsiqəsi ilə avtomobil idarə etməsinə icazə verilməyəcək.

Qeyd edək ki, dünyada yaşlı sürücülərin iştirakı ilə baş verən qəzalar ciddi təhlükəsizlik problemi kimi qiymətləndirilir. Məsələn, Yaponiyada 75 yaşdan yuxarı sürücülər avtomobillərində “yaşlı sürücü” mənasını verən “Koreija” işarəsi yapışdırmağa məcbur ediliblər. Bu kimi tədbirlərin gələcəkdə digər ölkələrdə də tətbiq ediləcəyi gözlənilir.

Yeni qayda bəzi yaşlı vətəndaşların narazılığına səbəb olub. Xüsusilə tək yaşayan və gündəlik işlərini həll etmək üçün avtomobildən istifadə edən şəxslər bu dəyişikliklərin onlara çətinlik yaradacağını bildirirlər.

Bəsti Rəfizadə
Sfera.az