Prezident Rəcəb Tayyib Ərdoğanın sədrliyi ilə keçirilən iclasın yekunlarına dair Türkiyə Milli Təhlükəsizlik Şurasının bəyanatında qeyd olunub ki, Ankara Rusiya-Ukrayna münaqişəsinin həllinə istənilən töhfəni verməyə hazırdır.

"İclasda Türkiyənin Rusiya və Ukrayna arasında daimi sülhün qurulması üçün məsuliyyəti öz üzərinə götürməyə və bu prosesə istənilən töhfəni verməyə hazır olduğu təsdiqlənib", - sənəddə qeyd olunub.

Siyasi şərhçi Kənan Novruzov Sfera.az-a açıqlamasında bildirib ki, müharibənin ilk günündən Ankara tərəflər arasında balanslı davranır. Ukraynanın ərazi bütövlüyünü dəstəkləməklə yanaşı, Türkiyə eyni zamanda Rusiyaya qarşı sanksiyalara da qoşulmur.

K. Novruzov söyləyib ki, indiyə qədər məhz Türkiyənin səyləri və iradəsi nəticəsində Taxıl Sazişi barədə razılığa gəlinib, tərəflər arasında əsir mübadiləsi həyata keçirilib. "Həmçinin İstanbulda artıq üçüncü raundu keçirilmiş müzakirələr də Türkiyənin uğurlu vasitəçiliyini göstərir", – deyə siyasi şərhçi əlavə edib.

K. Novruzov qeyd edir ki, Ərdoğan daha əvvəl yaxın gələcəkdə sülh masasının İstanbulda qurulacağını, müharibənin bitmə ehtimalını bildirmişdi:

“Ankaranın bu təşəbbüskarlığı ABŞ-ın Rusiyanı təhdid etməyə başladığı və ona Ukrayna ilə danışıqlara başlamaq üçün "son tarix" qoyduğu vaxta təsadüf edir. Bu isə iki mümkün versiyanı gündəmə gətirir.

Birinci versiya budur ki, ola bilsin, Ankara Vaşinqtonun "moderatorluğundan" narazıdır. Buna görə də Ərdoğan ölkəsinin məsuliyyəti öz üzərinə götürməyə hazır olduğunu açıq şəkildə bəyan edib. Mümkündür ki, Türkiyə bu məsələdə həm də Rusiyanın maraqlarını qorumağa çalışır və ABŞ-ın ritorikasını dəyişməsi ilə bağlı öz mövqeyini ortaya qoyur.

İkinci versiya isə ABŞ və Türkiyənin bu məsələdə koordinasiyalı fəaliyyət göstərməsi ehtimalıdır. İstisna deyil ki, Ağ Evin rəhbəri Donald Tramp Ankaranın beynəlxalq aləmdəki nüfuzuna, vasitəçilik təcrübəsinə və həm Rusiya, həm də Ukrayna ilə münasibətlərinə arxalanaraq ondan bu məsələdə kömək istəyib”.

O əlavə edib ki, həm Kiyev, həm də Moskvanın Ankaraya münasibəti Vaşinqtona nisbətən daha etibarlıdır:

“ABŞ isə Türkiyədən fərqli olaraq sürüşkən siyasət yürüdür ki, bu, həm Rusiyanın, həm də Ukraynanın inamsızlığına səbəb olur. Bütün hallarda, hansı versiyanın doğru olduğunu zaman göstərəcək. Amma bir şey aydındır: Türkiyə vasitəçilik təşəbbüslərini davam etdirəcək”.

Firuzə Əliyeva
Sfera.az

Ərdoğanın sülh mesajı - İstanbulda yeni danışıqlar masası qurula bilər