Almaniya Ukraynaya iki yeni “Patriot” sistemi göndərir

Almaniya Ukraynaya iki yeni “Patriot” hava hücumundan müdafiə sistemi göndərmək qərarına gəlib. Bu addım, Rusiyanın artan hava hücumları fonunda Ukraynanın müdafiə qabiliyyətini gücləndirmək məqsədi daşıyır.

Sfera.az xarici mediaya istinadın xəbər verir ki, Almaniyanın müdafiə naziri Boris Pistorius bildirib ki, bu göndəriş ABŞ ilə əldə olunmuş razılaşma çərçivəsində həyata keçiriləcək.

Razılaşmaya əsasən, Almaniya Ukraynaya “Patriot” sistemlərinə aid buraxıcı qurğular və digər komponentləri verəcək. Əvəzində isə ABŞ Almaniyaya ən yeni “Patriot” sistemlərini qısa müddətdə təqdim edəcək.

Almaniya ordusu yaxın günlərdə buraxıcı platformaları Ukraynaya çatdıracaq. Digər sistem hissələrinin isə iki-üç ay ərzində göndərilməsi nəzərdə tutulur.
Qeyd edək ki, “Patriot” sistemləri Rusiyanın ballistik raketlərinə qarşı yüksək effektivlik nümayiş etdirib. Almaniya bundan əvvəl Ukraynaya üç “Patriot” sistemi göndərmişdi. Rəsmi Berlin yeni göndərişlərin NATO-nun müdafiə qabiliyyətinə mənfi təsir etməyəcəyini açıqlayıb.

Bəsti Rəfizadə
Sfera.az