“Qəzzaya çox pul verdik, amma təşəkkür edən olmadı” - Tramp
Donald Tramp Şotlandiyada yerləşən “Turnberri” qolf kompleksində Böyük Britaniyanın Baş naziri Keir Starmerlə görüşü zamanı Qəzza ilə bağlı diqqətçəkən açıqlamalar verib.
Sfera.az xarici mediaya istinadən xəbər verir ki, jurnalistlərə danışan Trampa İsrailin Baş naziri Benyamin Netanyahunun Qəzzada aclıq problemi olmadığına dair fikirləri xatırladılıb. Tramp isə bu açıqlamayla razılaşmadığını bildirib:
“Bilmirəm, televizora baxanda uşaqların çox ac olduğunu görürəm. Netanyahuya dedim ki, bəlkə də fərqli bir yol seçməlisən”.
Qəzzaya göstərilən maddi yardımlardan da danışan Tramp, ABŞ-nin bu bölgəyə çoxlu vəsait ayırdığını deyib:
“Qəzzaya çox pul verdik, amma heç kim təşəkkür etmədi. Digər ölkələr də məsuliyyət götürməlidir”.
Tramp əlavə edib ki, Avropa İttifaqı Qəzzaya daha çox yardım göndərəcək və o, Starmerdən də dəstək istəyəcək.
Həmas tərəfindən girov saxlanılan israillilərlə bağlı da danışan Tramp, onların azad ediləcəyinə şübhə etdiyini deyib:
“Həmas onlardan insan qalxanı kimi istifadə edir. İsrail bu məsələdə qərar verməlidir. Mən nə edəcəyimi bilirəm, amma bunu açıqlamaq istəmirəm”.
Bəsti Rəfizadə
Sfera.az
