İsrail–İran gərginliyi səngimir: Atəşkəs pozula bilər - Açıqlama
İsrail Müdafiə naziri İsrael Katz, İranla 12 günlük müharibədən sonra əldə olunan atəşkəsin üzərindən bir ay keçsə də, İranın Ali Rəhbəri Ayətullah Seyid Əli Xameneiyə sərt xəbərdarlıq edib.
Sfera.az xəbər verir ki, Katz İsrailin cənubundakı Ramon aviabazasında çıxış edərək bildirib:
“Əgər İsraili təhdid etməyə davam etsəniz, bizim uzun qolumuz yenidən Tehrana və birbaşa sizə daha böyük güclə çatacaq. Təhdid etməyin, yoxsa nəticələrini görəcəksiniz”.
Qeyd edək ki, bundan öncə İranın xarici işlər nazirinin müavini Məcid Taxt-Ravançi atəşkəsin pozula biləcəyini istisna etməmiş və ABŞ ilə danışıqlar üçün hücumların dayandırılmasına dair təminat istəmişdi.
Sözügedən məsələ ilə bağlı Sfera.az-a danışan siyasi şərhçi Kənan Novruzov bildirib ki, hər iki tərəfin açıqlamaları mövcud atəşkəsin kifayət qədər kövrək olduğunu və yenidən pozulma ehtimalının real göründüyünü göstərir.
Onun sözlərinə görə, diqqətçəkən məqam Katzın sərt təhdidinin məhz iranlı diplomatın açıqlamalarından sonra səslənməsidir:
“Görünür, burada əsas məqsəd İran–ABŞ danışıqlarının bərpasına mane olmaq və prosesin irəliləməsinə imkan verməməkdir.
Təl-Əviv heç bir halda Vaşinqtonla Tehran arasında münasibətlərin normallaşmasını istəmir. Xatırlatmaq yerinə düşər ki, İsrailin İrana son hücumunun da əsas hədəfi məhz müzakirələrin qarşısını almaq idi və baş nazir Benyamin Netanyahu komandası ilə birlikdə 12 gün davam edən savaş nəticəsində buna nail oldu”.
K.Novruzov hazırkı vəziyyətdə nüvə danışıqlarının yenidən bərpasının daha da çətin göründüyünü qeyd edib.
Onun fikrincə, bunun üçün əvvəlcə ABŞ İranın etimadını qazanmalıdır:
“Lakin İsrailin mövqeyi göstərir ki, bu prosesin qarşısını almaq üçün bütün vasitələrdən istifadə ediləcək. Yeni bir hücum olmasa belə, səslənən sərt bəyanatlar və ortaya qoyulan siyasət Tehranı ehtiyatlı davranmağa vadar edə bilər. Digər tərəfdən, Qəzzadakı gərginliklər sona çatdıqdan sonra Netanyahunun hakimiyyətdən getməsi və hətta onun məsuliyyətə cəlb olunması istisna deyil. Məhz bu səbəbdən o, iqtidarını qorumaq üçün müharibə variantını ön planda saxlayır”.
Şərhçi əlavə edib ki, İsrailin İrana qarşı mümkün yeni hücumları da həm regiondakı gərginliyi artırmaq, həm də Netanyahunun siyasi ömrünü uzatmaq cəhdi kimi qiymətləndirilə bilər:
"Bir sözlə, Yaxın Şərq üzərindəki “qara buludlar” hələ də dağılmayıb. Əksinə, ola bilsin ki, bölgə hazırda “fırtınaqabağı səssizlik” mərhələsindən keçir".
Fidan Hacızadə
Sfera.az
