Yaponiyada qadınların orduya yolu tam açıldı

Yaponiya Müdafiə Nazirliyi qadınların ölkənin silahlı qüvvələrinə qəbulu ilə bağlı son məhdudiyyətləri aradan qaldırıb.

Sfera.az xəbər verir ki, avqustun 1-dən etibarən qadınlar hətta nüvə, bioloji və kimyəvi müdafiə bölmələrində də xidmət edə biləcəklər. Hərbi idarə bu addımını bu sahələrdə təhlükəsizlik tədbirlərinin artırılması ilə izah edib.

Qeyd edək ki, 2011-ci ilin yazında Fukusima-1 AES-də baş vermiş qəza nəticəsində çirklənmiş ərazilərin zərərsizləşdirilməsi üçün nüvə müdafiə bölmələri istifadə olunur. Orada kadr çatışmazlığı var və Müdafiə Nazirliyi hesab edir ki, qadınların cəlb olunması bu problemin həllinə kömək edəcək. Şəxsi təhlükəsizliyini təmin etmək üçün onlar xüsusi qoruyucu vasitələr alacaqlar və xüsusi təchiz olunmuş avtomobillərdə hərəkət edəcəklər.

Yaponiya Müdafiə Nazirliyi 1993-cü ildən silahlı qüvvələrdə qadınların iştirakını genişləndirir. Onlar indi hərbi təyyarələri idarə edə, döyüş ordu hissələrində və dəniz gəmilərində, o cümlədən sualtı qayıqlarda xidmət edə bilərlər.