Son aylar Yaxın Şərqdə baş verən gərgin proseslər dünya ictimaiyyətinin diqqətini bir daha Fələstin məsələsinə yönəldib. Xüsusilə İsrailin Qəzzada həyata keçirdiyi hərbi əməliyyatlar, minlərlə mülki insanın həlak olması və bölgədə humanitar böhranın dərinləşməsi beynəlxalq reaksiyalara səbəb olub. Bu vəziyyət bir sıra Qərb dövlətlərini Fələstinlə bağlı daha sərt və prinsipial mövqe sərgiləməyə vadar edir.

Məlumata görə, Fransa Fələstin dövlətini rəsmən tanımağa hazırlaşır. Kanada da bu istiqamətdə oxşar addım atmağı planlaşdırır. Bu qərarların verilməsi Fələstin məsələsində beynəlxalq hüququn tətbiqi baxımından mühüm mərhələ sayıla bilər.

Maraqlıdır, bu tanınma hansı nəticələrə gətirib çıxara bilər və bölgədəki gərgin geosiyasi mənzərəni dəyişəcəkmi?

Mövzu ilə bağlı Sfera.az-a açıqlama verən politoloq Məhəmməd Əsədullazadə bildirib ki, Fələstin uzun illərdir özünü müstəqil dövlət kimi elan etsə də, İsrail onun bu statusunu qəbul etmir və hüquqlarını tanımır.

“İsrailin Qəzzada apardığı hərbi əməliyyatlar, İordan çayının qərb sahillərinin İsrail ərazisi kimi legitimləşdirilməsi haqqında qanun qəbul etməsi Fransa və Kanadada ciddi narahatlıq yaradıb. Bu ölkələr beynəlxalq hüquq prinsiplərinə əsaslanaraq Fələstin dövlətini tanımağa hazır olduqlarını bəyan ediblər”, – deyə politoloq vurğulayıb.

Bununla belə, Əsədullazadənin sözlərinə görə, bu tanınma hər hansı ciddi dəyişiklik yaratmaya da bilər:

“Çünki İsrailin arxasında onu hər zaman dəstəkləyən güclü müttəfiq olan ABŞ dayanır. Tramp hətta Qəzzada əhalinin köçürülməsində maraqlıdır. Belə olan təqdirdə, Fələstin üçün proses müsbət inkişaf etməyəcək”.

Qeyd edək ki, indiyədək BMT-yə üzv olan 193 ölkədən 143-ü Fələstini tanıyıb.

Eyni zamanda Aİ-nin 27 üzvündən səkkizi – Polşa, Bolqarıstan, Rumıniya, Macarıstan, Çexiya, Slovakiya, İsveç və Kipr – Fələstini dövlət kimi tanıyır. Onlardan yalnız İsveç 2014-cü ildə Fələstini suveren dövlət kimi tanıyıb. Kamerun və Eritreya istisna olmaqla, bütün Afrika dövlətləri Fələstini dövlət kimi tanıyır.

Firuzə Əliyeva
Sfera.az

Fələstini tanıyan ölkələrin sayı artır: "Bu, ciddi dəyişiklik yaratmayacaq"