Kiyev əsgər maaşlarını ödəyə bilmir – Avropa maliyyə dəstəyi göstərə bilər

Ukrayna Prezidenti Volodimir Zelenski davam edən müharibənin dördüncü ilində ordu sıralarını qorumaq üçün əsgər maaşlarının bir hissəsinin Avropa tərəfindən ödənilməsini istəyir. Kiyev artan hərbi xərclər və büdcə kəsiri səbəbindən könüllü əsgərləri cəlb etməkdə çətinlik çəkir.

Sfera.az xarici mediaya istinadən xəbər verir ki, prezident Zelenski Kiyevdə jurnalistlərə verdiyi açıqlamada bildirib ki, Avropa ölkələrindən birbaşa maliyyə dəstəyi tələb ediləcək. “Avropalılar indiyədək yalnız silah üçün vəsait ayırırdılar. Amma bizim əsgərlərimiz elə özləri bir silahdır”, – deyə dövlət başçısı vurğulayıb.

Ukrayna hökuməti, cəbhəyə könüllüləri cəlb etmək üçün yüksək maaşlarla bağlanan müqavilələri əsas motivasiya alətinə çevirib. Lakin ölkə iqtisadiyyatı bu maaş artımlarını qarşılayacaq gücündə deyil. 2023-cü ildə ÜDM-in 20 faizini aşan büdcə kəsiri buna imkan vermir.

Baş nazir Yuliia Sviridenko “Bloomberg”ə açıqlamasında vergiləri artırmaq niyyətində olmadıqlarını bildirib. Beynəlxalq Valyuta Fondu isə Ukraynaya 16 milyard dollarlıq kredit proqramı təqdim etməklə yanaşı, büdcə intizamına əməl edilməsinə dair təzyiqlərini davam etdirir.

Ukrayna 2026-cı ilin sonunadək 75 milyard dollar maliyyə yardımı axtarır. Lakin bu məbləğin yalnız yarısı indiyədək xarici donorlar tərəfindən öhdəliyə alınıb.
Zelenski bildirib ki, məsələ ilə bağlı Avropa Komissiyası rəhbəri Ursula fon der Leyen, NATO Baş katibi Mark Rutte, Fransa Prezidenti Emmanuel Makron, Britaniyanın Baş naziri Keir Starmer və ABŞ rəsmiləri ilə birbaşa əlaqə saxlanılıb.

Ukrayna lideri mövzunun həssas olduğunu qeyd edərək, ölkəsinin müdafiə sənayesini inkişaf etdirmək üçün illik 25 milyard dollarlıq əlavə maliyyəyə ehtiyac olduğunu vurğulayıb. Avropa İttifaqı isə bu tələbə hələ rəsmi cavab verməyib.

Bəsti Rəfizadə
Sfera.az