Çindən mühüm yenilik - Peykləri vuran silah hazırlanır
Çinli alimlər orbitdəki peykləri hədəfə ala biləcək gücdə lazer silahının hazırlanmasına imkan verən yeni nəsil kristal hazırlayıblar.
Sfera.az xarici mediaya istinadən xəbər verir ki, Çinin Hefey Fizika Elmləri Tədqiqat İnstitutu, diametri 60 millimetr olan dünyanın ən böyük BGSe (baryum selenoqalat) kristalını istehsal etdiklərini açıqlayıb.
Mütəxəssislərin sözlərinə görə, bu kristalın xüsusiyyətləri lazer texnologiyasında inqilab yarada bilər.
“South China Morning Post” (SCMP) qəzetinin məlumatına əsasən, kristal 550 meqavat/santimetr gücündə lazer şüalanmasına davam gətirə bilir. Bu isə onu yüksək enerjili lazer silahlarının istehsalında istifadə üçün ideal edir. Əvvəlki nəsil hərbi məqsədli kristallar bu qədər gücə tab gətirə bilmir və tez sıradan çıxır.
SCMP bildirir ki, alimlər uzun illərdir yönləndirilən enerji silahlarının öz-özünü məhv etmə problemini həll etməyə çalışırlar. Bu səbəbdən indiyədək lazerlərin gücü və təsir məsafəsi ciddi şəkildə məhdudlaşdırılırdı.
Yeni kristalın hazırlanmasına rəhbərlik edən professor Vu Hayşin və onun komandası, bu texnologiyanın yalnız hərbi sahədə deyil, həm də mülki sahələrdə, xüsusilə də infraqırmızı müşahidə sistemləri və tibbi diaqnostika cihazlarının inkişafında istifadə edilə biləcəyini bildirirlər.
Ekspertlər hesab edirlər ki, bu yenilik gələcəkdə Çin hərbi texnologiyalarının imkanlarını əhəmiyyətli dərəcədə genişləndirə bilər.
Bəsti Rəfizadə
Sfera.az
