Rusiya İstanbul danışıqlarını bəyənib: "Vacib razılaşmalar oldu"

Rusiya və Ukrayna arasında Türkiyənin ev sahibliyi ilə keçirilən üçüncü raund sülh danışıqları ilə bağlı Kreml açıqlama yayıb. Kremlin sözçüsü Dmitri Peskov, İstanbulda əldə olunan razılaşmaların vacib və müsbət olduğunu bildirib.

Sfera.az xarici mediaya istinadən xəbər verir ki, Peskovun sözlərinə görə, Ukrayna tərəfi danışıqlar zamanı liderlər zirvəsinin keçirilməsi təklifini gündəmə gətirib. O, bu istiqamətdə lazımi hazırlıq işlərinin aparılmasının vacibliyini vurğulayıb.

İstanbulun Çırağan Sarayında keçirilən görüşdən sonra jurnalistlərə açıqlama verən Peskov qeyd edib ki, tərəflər arasında ən azı 1200 hərbçinin qarşılıqlı əsir mübadiləsi və həlak olmuşların cənazələrinin təhvili ilə bağlı razılıq əldə olunub.

“Müzakirələrdən ciddi irəliləyiş gözləmirdik, bu, real deyildi. Rusiya nümayəndə heyətinin rəhbəri Vladimir Medinski də qeyd edib ki, təqdim olunan memorandum layihələri bir-birinə ziddir. Lakin gündəmə gətirilən məsələlər konkret nəticələrə gətirib çıxara biləcək konstruktiv iş tələb edir. Əsir və cənazələrin mübadiləsi isə humanitar baxımdan çox əhəmiyyətlidir və bu məsələnin diqqət mərkəzində qalması vacibdir”, – deyə Peskov bildirib.

Xatırladaq ki, dünən İstanbulda Rusiya və Ukrayna nümayəndə heyətləri arasında üçüncü raund sülh danışıqları keçirilib. Görüş zamanı Rusiya tərəfi Ukrayna ilə onlayn fəaliyyət göstərəcək üç işçi qrupunun yaradılmasını təklif edib. Tərəflər arasında əsir və cənazələrin qarşılıqlı təhvil verilməsi məsələsində razılıq əldə olunub.

Bəsti Rəfizadə
Sfera.az