“İsraillə İranın hərbi eskalasiyası nəticə olaraq tərəflərin yeni dünya nizamındakı münasibətlər sisteminə nisbi pozitivliyə doğru təsir göstərə bilər”.

Sfera.az xəbər verir ki, bu sözləri siyasi şərhçi Aqşin Kərimov deyib.

Onun sözlərinə görə, İranın xarici işlər naziri Abbas Araqçinin "Foxnews" a müsahibəsindəki ştrixlərə baxanda da Tehranda bu ideya üzərində yanaşmalara dəstək qruplarının olduğunu demək olar:

“İranın rəsmi siyasətini müəyyən edən Seyid Əli Xamenei də daxil olmaqla yüksək vəzifəli İran rəsmiləri dəfələrlə İranın “İsraili məhv etmək məqsədini” vurğulayıblar. Texniki baxımdan Araqçinin açıqlaması geosiyasi boşluqlara düşmüş İranın İsraillə əlavə hərbi toqquşmaya girməkdən yayınmaq üçün seçilmiş diplomatik mətn kimi oxuna bilər. Ancaq ehtimalla səhnənin arxasında İsraillə İranın münasibətlərindəki paradiqmaları dəyişdirmək aktuallıq kəsb edir”.

Siyasi şərhçi qeyd edib ki, İranın ABŞ ilə bərabər, E3 formatında ( Böyük Britaniya, Fransa, Almaniya) paralel danışıqlar aparması geniş miqyasda İsraillə Tehranın əlaqələrinə yeni baxış gətirəcək:

“Bu, İranla İsrail arasındakı mümkün vasitəçilik səylərinin perspektivini də vurğulayan kodları aça bilər. Digər tərəfdən isə Rusiya və Çin də moderatorluq iddialarını davamlı olaraq gündəmdə saxlayacaq. Bu isə İrana bağlı strategiyaların Qərb-Rusiya-Çin qarşıdurmasındakı geosiyasi rəqabətin rəngini dəyişəcək.
Lakin İran daxilində İsraillə gələcək əlaqələrin necə qurulacağına dair saraydaxili fikir ayrılıqlarının olması ehtimalları da yüksəkdir. Gümanla bu fikir haçalanmaları İranın ali rəhbəri Seyid Əli Xameneinin varislik irsinə də təsirsiz ötüşməyəcək”.

Firuzə Əliyeva
Sfera.az

İran–İsrail münasibətlərində yeni dönüş: Gizli danışıqlar aparılır