“Alfa kişi” müsəlman ölkəyə elçi göndərildi - Əhali ayağa qalxdı
ABŞ Prezidenti Donald Trampın Malayziyaya səfir təyin etmək istədiyi Nik Adams ölkədə kütləvi etirazlara səbəb olub. İslam əleyhinə açıqlamaları ilə tanınan Adamsın səfirlik namizədliyi, Malayziyanın paytaxtı Kuala Lumpurda onlarla insanın ABŞ səfirliyi qarşısında aksiya keçirməsinə səbəb olub.
Sfera.az xarici mediaya istinadən xəbər verir ki, etirazçılar namizədliyin geri götürülməsini tələb ediblər. “Alfa kişi” kimi təqdim olunan və Avstraliya əsilli olan Adamsın, xüsusilə İsrailin Qəzzadakı hərbi əməliyyatlarına dəstəyi də ölkə ictimaiyyətində narazılıq yaradıb.
Malayziya Baş naziri Ənvər İbrahim məsələ ilə bağlı açıqlamasında prosesin ilkin mərhələdə olduğunu bildirib. O, hökumətin məsələni ciddi şəkildə qiymətləndirəcəyini və ABŞ ilə münasibətləri qorumağa çalışacaqlarını qeyd edib.
Etiraz aksiyalarına rəhbərlik edən hakim koalisiyanın gənclər qanadının nümayəndələri ABŞ səfirliyinə təqdim etdikləri məktubda Adamsın cəmiyyətdə parçalanmaya səbəb ola biləcək açıqlamalarına diqqət çəkərək, onun namizədliyinin yenidən nəzərdən keçirilməsini tələb ediblər.
Bəsti Rəfizadə
Sfera.az
