Şimali Koreya böyük raket hissələrinin daşınmasını asanlaşdırmaq məqsədilə sahil zonasında yeni, nəhəng bir liman inşa edib. Bu barədə yeni peyk görüntüləri yayılıb. Mütəxəssislər bildirirlər ki, bu addım Pxenyanın qitələrarası ballistik raket (ICBM) proqramını inkişaf etdirmək planlarının bir hissəsidir.

Sfera.az xarici mediaya istinadən xəbər verir ki, yeni tikili, Şimali Koreyanın Sohae Peyk Fırlatma Stansiyası yaxınlığında tikilib.

Qeyd olunur ki, bu obyekt ölkənin casus peyklərin buraxılması və digər raket sınaqları üçün əsas məkanlardan biridir.

Tikilən yeni liman daha iri raket hissələrinin rels sistemi olmadan, birbaşa dəniz yolu ilə daşınmasına imkan verir. Bu isə Pxenyanın daha uzun mənzilli və güclü raketləri hazırlamasına şərait yaradır.

Şimali Koreya lideri Kim Çen In 2022-ci ildə bu stansiyanı şəxsən ziyarət edib və burada hərbi casus peyklər də daxil olmaqla müxtəlif raketlərin buraxılması üçün modernləşmə və genişlənmə işlərinin aparılması barədə göstəriş verib.

Yeni peyk görüntülərində, limanın yanındakı fəaliyyətə hazır görünən gəmilər müşahidə olunub. Məlumata görə, liman təxminən 28 ay ərzində tam şəkildə tamamlanıb. Paralel olaraq stansiya ərazisində yol və dəmir yolu infrastrukturunun genişləndirilməsi də davam etdirilir.

Şimali Koreya 2024-cü ilin may ayında bu stansiyadan növbəti casus peyk buraxılışını həyata keçirmək istəsə də, cəhd uğursuz olmuşdu. Lakin Kim Çen In layihədən vaz keçməyəcəyini və bu proqramın milli təhlükəsizlik baxımından strateji əhəmiyyət daşıdığını bəyan etmişdi.

Qeyd edək ki, Şimali Koreya ilk casus peykini 2023-cü ilin noyabrında orbitə yerləşdirməyə nail olmuşdu. Cənubi Koreyalı rəsmilərin fikrincə, Pxenyan bu sahədə Rusiya ilə əməkdaşlıq edir və iddialara görə, Ukrayna müharibəsinə hərbi dəstək qarşılığında Rusiyadan texnoloji yardım alır.

Şimali Koreya isə bütün hərbi fəaliyyətlərinin, o cümlədən nüvə proqramının, yalnız özünümüdafiə məqsədi daşıdığını və bu sahədə hər bir addımın ölkənin suveren hüququ olduğunu bildirir.

Bəsti Rəfizadə
Sfera.az

Şimali Koreyada müəammalı tikinti: “Raketlər dəniz yolu ilə daşınacaq”